Lucky Baskhar: ലക്കി ഭാസ്കർക്ക് കാലിടറുന്നുവോ! കളക്ഷൻ റിപ്പോർട്ടുകൾ സൂചിപ്പിക്കുന്നത് എന്ത്?

ദീപാവലി റിലീസായി എത്തിയ ദുൽഖർ സൽമാൻ ചിത്രമായിരുന്നു ലക്കി ഭാസ്കർ. വെങ്കി അറ്റ്ലൂരി  സംവിധാനം ചെയ്ത ഈ പിരീഡ് ക്രൈം ഡ്രാമ ചിത്രം മികച്ച പ്രേക്ഷക ശ്രദ്ധ നേടി മുന്നേറുകയാണ്. ഇപ്പോഴിതാ 5 ദിവസങ്ങളിലെ ചിത്രത്തിന്റെ ആ​ഗോള കളക്ഷൻ ഔദ്യോ​ഗികമായി പ്രഖ്യാപിച്ചിരിക്കുകയാണ് നിർമ്മാതാക്കളായ സിതാര എന്റർടെയ്ൻമെന്റ്സ്. 

ആദ്യ അഞ്ച് ദിനങ്ങൾ കൊണ്ട് ആ​ഗോള ബോക്സ് ഓഫീസിൽ നിന്ന് 61.4 കോടിയാണ് ചിത്രം നേടിയത്. റിലീസിന് ശേഷമുള്ള ഏറ്റവും മികച്ച കളക്ഷനാണ് ഞായറാഴ്ച നേടിയത്. എന്നാൽ തിങ്കളാഴ്ച കളക്ഷനിൽ കുറവ് സംഭവിച്ചെന്നാണ് കണക്കുകൾ സൂചിപ്പിക്കുന്നത്. 

ഞായറാഴ്ച 15.5 കോടി രൂപയാണ് നേടിയതെങ്കിൽ തിങ്കളാഴ്ച ചിത്രം നേടിയത് 6 കോടിയാണ്. അതേസമയം ഇനിയങ്ങോട്ടുള്ള പ്രവൃത്തി ദിവസങ്ങളിൽ കളക്ഷൻ വർദ്ധിപ്പിക്കുമെന്നാണ് ട്രേഡ് അനലിസ്റ്റുകളുടെ പ്രതീക്ഷ. 

വെങ്കി അറ്റ്ലൂരി രചിച്ച് സംവിധാനം ചെയ്ത ചിത്രം കേരളത്തിലും ഗൾഫിലും വമ്പൻ റിലീസായി വിതരണം ചെയ്യുന്നത് ദുൽഖർ സൽമാന്റെ വേഫെറർ ഫിലിംസാണ്. ഒരു വർഷത്തിന് മുകളിലെ ഇടവേളക്ക് ശേഷമാണ് ദുൽഖർ സൽമാൻ നായകനായ ഒരു ചിത്രം പ്രദർശനത്തിന് എത്തുന്നത്.

തെലുങ്ക്, മലയാളം, തമിഴ്, ഹിന്ദി ഭാഷകളിൽ റിലീസ് ചെയ്യുന്ന ചിത്രം സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്നാണ് നിർമ്മിച്ചിരിക്കുന്നത്. 

മീനാക്ഷി ചൗധരിയാണ് നായികാ വേഷത്തിൽ എത്തുന്നത്. ഭാസ്കർ എന്ന് പേരുള്ള ഒരു സാധാരണക്കാരനായ ബാങ്ക് കാഷ്യറുടെ അസാധാരണമായ കഥ പറയുന്ന ചിത്രമാണ് ലക്കി ഭാസ്കർ.