Dunki Movie : ഹാട്രിക് 1,000 കോടി ലോഡിങ്; ഡങ്കി ട്രെയിലർ

ബോക്സ് ഓഫീസിൽ ഹാട്രിക് ആയിരം കോടി നേട്ടത്തിനായി ഷാറൂഖ് ഖാന്റെ ഡങ്കി. ഡിസംബർ 21ന് തിയറ്ററുകളിൽ എത്തുന്ന ചിത്രത്തിന്റെ ട്രെയിലർ പുറത്ത് വിട്ടിരിക്കുകയാണ് അണിയറപ്രവർത്തകർ. അനധികൃതമായി കുടിയേറ്റം നടുത്തുന്നവരുടെ കഥയാണ് ഡങ്കിയെന്നാണ് ട്രെയിലറിൽ നിന്നും ലഭിക്കുന്ന സൂചന. ത്രീ ഇഡിയറ്റ്സ്. പികെ സഞ്ജു തുടങ്ങിയ ചിത്രങ്ങളുടെ സംവിധായകനായ രാജ്കുമാർ ഹിരാനിയാണ് ഡങ്കി ഒരുക്കിയിരിക്കുന്നത്. അനധികൃതമായി ഒരിടത്തേക്ക് പ്രവേശിക്കുന്നവരെയാണ് ഹിന്ദിയിൽ ഡങ്കി എന്നി വിശേഷിപ്പിക്കുന്നത്. 

ചിത്രത്തിൽ ഹാർഡയാൽ സിങ് ദില്ലൺ എന്ന ഹാർഡിയെന്ന കഥാപാത്രത്തെയാണ് ഷാറൂഖ് അവതരിപ്പിക്കുന്നത്. മൂന്ന് കാലഘട്ടത്തിലെ കഥാപാത്രത്തെ അവതരിപ്പിക്കാൻ ഷാറൂഖ് വ്യത്യസ്തമായ ഗെറ്റപ്പിലാണ് ചിത്രത്തിൽ എത്തുന്നത്. ഒരു വാക്ക് പാലിക്കാനുള്ള ഒരു സൈനികന്റെ യാത്രയുടെ ഹൃദയസ്പർശിയായ കഥയാണ് ഡങ്കിയുടേതെന്നാണ് അണിയറപ്രവർത്തകർ അറിയിക്കുന്നത്. 

തപ്സി പന്നുവാണ് ചിത്രത്തിൽ നായികയായെത്തുന്നത്. ബൊമ്മൻ ഇറാനി, വിക്കി കൗശല്‍ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. ജിയോ സ്റ്റുഡിയോസ്, റെഡ് ചില്ലീസ് എന്റർടെയ്മെന്റ്, രാജ്കുമാർ ഹിറാനി ഫിലിംസ് എന്നീ ബാനറുകളിലാണ് ചിത്രം നിർമ്മിക്കുന്നത്. 

പ്രീതം ആണ് സം​ഗീത സംവിധാനം നിർവഹിച്ചിരിക്കുന്നത്. മലയാളിയായ സി.കെ മുരളീധരൻ ആണ് ഛായാ​ഗ്രഹണം. പഠാൻ, ജവാൻ തുടങ്ങിയ ചിത്രങ്ങൾ പോലെ ഡങ്കിയും വമ്പൻ ഹിറ്റ് ആകുമെന്ന പ്രതീക്ഷയിലാണ് അണിയറപ്രവർത്തകരും ആരാധകരും. ബോക്സ് ഓഫീസിൽ 1000 കോടി കടന്ന ചിത്രങ്ങളാണ് പഠാനും ജവാനും.