Vettaiyan: പാട്രിക് ആയി തകർക്കാൻ ഫഹദ് എത്തുന്നു; `വേട്ടയനി`ലെ ക്യാരക്ടർ വീഡിയോ

ര‍ജനീകാന്ത് നായകനാകുന്ന വേട്ടയനിലെ ഫഹദ് ഫാസിലിന്റെ കഥാപാത്രത്തെ പരിചയപ്പെടുത്തി അണിയറ പ്രവർത്തകർ. ചിത്രത്തിൽ പാട്രിക് എന്ന കഥാപാത്രത്തെയാണ് ഫഹദ് അവതരിപ്പിക്കുന്നത്. രജനീകാന്തിനും അമിതാഭ് ബച്ചനും ഒപ്പമുള്ള ഫഹദിന്റെ ലൊക്കേഷൻ രം​ഗങ്ങളും അണിയറ പ്രവർത്തകർ പുറത്ത് വിട്ടു.

ഏറെ പ്രേക്ഷകപ്രീതി നേടിയ ജയ്ഭീം എന്ന ചിത്രത്തിന് ശേഷം ടി.ജെ ജ്ഞാനവേൽ തിരക്കഥയെഴുതി സംവിധാനം ചെയ്യുന്ന ചിത്രമാണ് വേട്ടയൻ. ദീപാവലിയോടനുബന്ധിച്ച് ഒക്ടോബർ 10ന് ചിത്രം തിയേറ്ററുകളിലെത്തും. 

കഴിഞ്ഞ ദിവസം മഞ്ജു വാര്യരുടെ താര എന്ന കഥാപാത്രത്തെ പരിചയപ്പെടുത്തി കൊണ്ടുള്ള വീഡിയോ പുറത്തുവിട്ടിരുന്നു. വേട്ടയന്റെ ഹ‍ൃദയവും ആത്മാവും എന്ന വിശേഷണമാണ് താരയ്ക്ക് നൽകിയിരിക്കുന്നത്. നടരാജ് എന്ന കഥാപാത്രത്തെയാണ് റാണ ദ​ഗ്​ഗുബതി അഴതരിപ്പിക്കുന്നത്. ചിത്രത്തിലെ മനസിലായോ എന്ന ​ഗാനം ഇതിനോടകം വൻ ഹിറ്റായി കഴിഞ്ഞു. 

അമിതാഭ് ബച്ചൻ, ഫഹദ് ഫാസിൽ, റാണ ദഗ്ഗുബതി, ദുഷാര വിജയൻ, റിതിക സിം​ഗ് തുടങ്ങി വൻ താരനിരയാണ് വേട്ടയനിൽ അണിനിരക്കുന്നത്. ചിത്രത്തിലെ 'മനസ്സിലായോ' എന്ന ഗാനം റിലീസ് ചെയ്ത് മണിക്കൂറിനുള്ളിൽ തന്നെ ട്രന്റിം​ഗ് ലിസ്റ്റിൽ ഒന്നാമതെത്തിയിരുന്നു. അനിരുദ്ധ് രവിചന്ദറാണ് സൂപ്പർ സ്റ്റാർ രജനീകാന്തിനൊപ്പം മഞ്ജു വാര്യരും ആടി തകർത്ത ഈ ഗാനം ഒരുക്കിയിരിക്കുന്നത്. 

രജനീകാന്തിന്റെ 170-ാമത്തെ ചിത്രമാണ് വേട്ടയൻ. ലൈക്ക പ്രൊഡക്ഷൻസിന്റെ ബാനറിൽ  സുബാസ്കരൻ നിർമ്മിക്കുന്ന സിനിമ തമിഴ്, തെലുങ്ക്, കന്നട, ഹിന്ദി എന്നീ ഭാഷകളിൽ തിയറ്ററുകളിലെത്തും.