Gold Movie: `അൽഫോൻസ് പുത്രൻ ചിത്രം കമിങ് സൂൺ`; കളറായി `ഗോൾഡി`ന്റെ പുതിയ പോസ്റ്റർ
നേരം, പ്രേമം എന്നീ ചിത്രങ്ങൾ പോലെ തന്നെ ഗോൾഡിനും ട്രെയിലർ ഉണ്ടായിരിക്കുന്നതല്ല.
പൃഥ്വിരാജ് സുകുമാരൻ, നയൻതാര എന്നിവരെ കേന്ദ്ര കഥാപാത്രങ്ങളാക്കി അൽഫോൻസ് പുത്രൻ സംവിധാനം ചെയ്യുന്ന ചിത്രമാണ് ഗോൾഡ്. പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന അൽഫോൻസ് ചിത്രമാണിത്. ചിത്രത്തിന്റെ പുതിയ പോസ്റ്റർ പങ്കുവെച്ചിരിക്കുകയാണ് പൃഥ്വിരാജ് ഉൾപ്പെടെയുള്ളവർ. പൃഥ്വി, നയൻതാര, ഷമ്മി തിലകൻ, കൃഷ്ണ ശങ്കർ, ബാബു രാജ്, ചെമ്പൻ വിനോദ്, ശബരീഷ് വർമ്മ തുടങ്ങിയവരെയെല്ലാം പോസ്റ്ററിൽ കാണാം. അൽഫോൻസ് പുത്രൻ ചിത്രം ഗോൾഡ് ഉടനെത്തുന്നു എന്ന ക്യാപ്ഷനോടെയാണ് താരങ്ങൾ പോസ്റ്റർ പങ്കുവെച്ചിരിക്കുന്നത്. ഓണം റിലീസ് ആയി സെപ്റ്റംബർ 8നാണ് തീയേറ്ററുകളിൽ റിലീസ് ചെയ്യുന്നത്. നേരം, പ്രേമം എന്നീ ചിത്രങ്ങൾ പോലെ തന്നെ ഗോൾഡിനും ട്രെയിലർ ഉണ്ടായിരിക്കുന്നതല്ല. നേരത്തെ ഇറങ്ങിയ ചിത്രത്തിന്റെ ടീസറും പോസ്റ്ററും ഒക്കെ ഏറെ ശ്രദ്ധ നേടിയിരുന്നു.
റിപ്പോർട്ടുകൾ അനുസരിച്ച് ആമസോൺ പ്രൈം വീഡിയോസാണ് ചിത്രത്തിൻറെ ഡിജിറ്റൽ അവകാശങ്ങൾ നേടിയിരിക്കുന്നത്. നിവിൻ പോളിയുടെ പ്രേമം ഇറങ്ങി ഏഴ് വർഷങ്ങൾക്ക് ശേഷമെത്തുന്ന അൽഫോൺസ് പുത്രൻ ചിത്രമെന്ന പ്രത്യേകതയും ഗോൾഡിനുണ്ട്. ചിത്രത്തിൻറെ തമിഴ്നാട്ടിലെ തിയേറ്റർ അവകാശങ്ങൾ എസ് എസ് ഐ പ്രൊഡക്ഷന്‍സ് നേടിയിരുന്നു. റെക്കോർഡ് തുകയ്ക്കാണ് ചിത്രത്തിൻറെ തമിഴ്നാട്ടിലെ വിതരണാവകാശങ്ങൾ വിറ്റ് പോയത്. ഫില്‍മിബീറ്റ് റിപ്പോര്‍ട്ട് ചെയ്യുന്നത് അനുസരിച്ച് 1.25 കോടി രൂപയാണ് ചിത്രം തമിഴ്നാട്ടിലെ വിതരണാവകാശത്തിൽ നിന്ന് മാത്രം സ്വന്തമാക്കിയത്. അൽഫോൺസ് പുത്രന്റെ രണ്ടാമത്തെ ചിത്രം പ്രേമത്തിന് തമിഴ്‌നാട്ടിൽ വൻ സ്വീകാര്യത ലഭിച്ചിരുന്നു. ഇതാണ് ഗോൾഡ് വൻ തുകയ്ക്ക് വിറ്റ് പോകാൻ കാരണമെന്നാണ് റിപ്പോർട്ടുകൾ സൂചിപ്പിക്കുന്നത്.
ചിത്രത്തിന് ട്രെയിലർ ഉണ്ടാകില്ലയെന്ന് സംവിധയകൻ അറിയിച്ചിരുന്നു. പകരം ചിത്രത്തിലെ ഒരു ഗാനത്തിന്റെ വീഡിയോ റിലീസിന് മുമ്പ് പുറത്ത് വിടുമെന്ന് അൽഫോൺസ് പുത്രൻ അറിയിച്ചു. ജോഷി എന്ന കഥാപാത്രത്തെയാണ് പൃഥ്വിരാജ് ഗോൾഡിൽ അവതരിപ്പിക്കുന്നത്. ചിത്രത്തിലെ നയൻതാരയുടെ കഥാപാത്രത്തിന്റെ പേര് സുമംഗലി ഉണ്ണികൃഷ്ണൻ എന്നാണ്. 2021ൽ ഇറങ്ങിയ കുഞ്ചാക്കോ ബോബൻ ചിത്രം നിഴലിന് ശേഷമെത്തുന്ന നയൻതാരയുടെ മലയാള ചിത്രമാണ് ഗോൾഡ്.
മല്ലിക സുകുമാരൻ, വിനയ് ഫോർട്ട്, അൽതാഫ് സലീം, സാബുമോൻ, റോഷൻ മാത്യു, ലാലു അലക്സ്, ജാഫർ ഇടുക്കി, ജഗദീഷ്, അബു സലീം, സുരേഷ് കൃഷ്ണ, ദീപ്തി സതി, സുധീഷ്, അജ്മൽ അമീർ, പ്രേം കുമാർ, സൈജു കുറിപ്പ്, ജസ്റ്റിൻ ജോൺ, ഫയ്സൽ മുഹമ്മദ്, എം ഷിയാസ് എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്. പൃഥ്വിരാജ് പ്രൊഡക്ഷന്റെയും മാജിക് ഫ്രെയിംസിന്റെയും ബാനറിൽ സുപ്രിയ മേനോനും ലിസ്റ്റിൻ സ്റ്റീഫനും ചേർന്നാണ് ചിത്രം നിർമ്മിക്കുന്നത്. സംവിധായകനായ അൽഫോൺസ് പുത്രൻ തന്നെയാണ് ചിത്രത്തിന്റെ കഥ, എഡിറ്റിങ്, സംഘട്ടനം, വിഎഫ്എക്സ്, ആനിമേഷൻ, കളർ ഗ്രേഡിങ് തുടങ്ങിയവ കൈകാര്യം ചെയ്തിരിക്കുന്നത്. അൽഫോൺസിന്റെ കരിയറിലെ മൂന്നാമത്തെ ചിത്രമാണ് ഗോൾഡ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...