The GOAT Movie: പിറന്നാൾ ദിനത്തിൽ വിജയ് ആരാധകർക്ക് ആവേശമായി `ദ് ​ഗോട്ട്`; ആക്ഷൻ വീഡിയോ ട്രെൻഡിം​ഗായി

വിജയ് നായകനാകുന്ന ഏറ്റവും പുതിയ ചിത്രമാണ് ദ് ഗ്രേറ്റസ്റ്റ് ഓഫ് ഓൾ ടൈമിന്റെ (ഗോട്ട്). പ്രഖ്യാപന സമയം മുതൽ ആരാധകർ കാത്തിരിക്കുകയാണ് ചിത്രത്തിന്റെ റിലീസിനായി. ഇന്ന് താരത്തിന്റെ പിറന്നാളാണ്. പിറന്നാൾ ദിനത്തിൽ ആരാധകർക്ക് കൂടുതൽ ആവേശമുണർത്തിയിരിക്കുകയാണ് ​ഗോട്ടിലെ ആക്ഷൻ ചേസ് വീഡിയോ. ഡബിൾ റോളിലാണ് ചിത്രത്തിൽ വിജയ് എത്തുന്നത്. ആക്ഷൻ ചേസ് രം​ഗത്തിന്റെ വീഡിയോ ആണ് ഇപ്പോൾ‍ പുറത്തുവിട്ടിരിക്കുന്നത്. 

യൂട്യൂബിൽ ട്രെൻഡിം​ഗ് നമ്പർ 1 പൊസിഷനിലാണ് വീഡിയോ. വീഡിയോ പുറത്തിറങ്ങി മണിക്കൂറുകൾക്കുള്ളിൽ 2 മില്യൺ ആളുകൾ ഇത് കണ്ടു കഴിഞ്ഞു. ചിത്രത്തിന്റെ ഷൂട്ടിം​ഗ് തിരുവനന്തപുരത്തും നടന്നിരുന്നു. ക്ലൈമാക്സ് രം​ഗങ്ങളാണ് തിരുവനന്തപുരത്ത് ചിത്രീകരിച്ചതെന്നാണ് റിപ്പോർട്ട്. കേരളത്തിലും ഒരു വലിയ ആരാധകവൃന്ദം വിജയ്ക്ക് ഉണ്ട്.

എജിഎസ് എന്റർടൈൻമെന്റ്സ് ആണ് ഗോട്ട് നിർമ്മിക്കുന്നത്. വെങ്കട് പ്രഭുവാണ് ചിത്രത്തിന്റെ സംവിധായകൻ. മാനാട്, മങ്കാത്ത, ചെന്നൈ 600028 എന്നീ ചിത്രങ്ങള്‍ ഒരുക്കിയ സംവിധായകനാണ് വെങ്കട്ട് പ്രഭു. വെങ്കട്ടും വിജയിയും ആദ്യമായി ഒന്നിക്കുന്ന ചിത്രം കൂടിയാണ് ഗോട്ട്. യുവൻ ശങ്കർ രാജയാണ് ഗോട്ടിന്റെ സം​ഗീത സംവിധാനം നിർവഹിക്കുന്നത്. ചിത്രത്തിൽ ജയറാം പ്രധാന വേഷത്തിൽ എത്തുന്നു. തുപ്പാക്കിക്ക് ശേഷം ജയറാമും വിജയിയും വീണ്ടുമൊന്നിക്കുന്ന ചിത്രമെന്ന പ്രത്യേകതയും ഗോട്ടിനുണ്ട്. 

മീനാക്ഷി ചൗധരി, സ്നേഹ, ലൈല, പ്രശാന്ത്, പ്രഭുദേവ, മോഹൻ, യോഗി ബാബു, അജ്മൽ അമീർ, വിടിവി ഗണേശ്, പ്രേംജി അമരൻ, അരവിന്ദ് ആകാശ്, അജയ് രാജ്, വൈഭവ് എന്നിവരാണ് ചിത്രത്തിലെ പ്രധാനകഥാപാത്രങ്ങളെ അവതരിപ്പിക്കുന്നത്. സിദ്ധാർഥി നുനിയാണ് ഛായഗ്രാഹകൻ, വെങ്കട് രാജനാണ് സിനിമയുടെ എഡിറ്റർ. ദിലിപി സുബ്ബരായനാണ് ചിത്രത്തിലെ സംഘട്ടന രംഗങ്ങൾ ഒരുക്കുന്നത്.