Kaatera: 400 സ്ക്രീനുകളില്‍ 25 ദിവസം; റെക്കോർഡുമായി കന്നഡ ചിത്രം

കർണാടകയിലെ 400 തിയേറ്റുകളിൽ 25 ദിവസം പിന്നിട്ട് റെക്കോർഡുമായി കാട്ടേര. കന്നഡ താരം ദര്‍ശന്‍റെ ഏറ്റവും പുതിയ ചിത്രം കാട്ടേരയാണ് റെക്കോർഡ് സ്വന്തമാക്കിയിരിക്കുന്നത്. ചിത്രം റിലീസ് ചെയ്ത് ഒരു മാസം പിന്നിട്ടപ്പോഴാണ് ചിത്രം പുതിയ റെക്കോർഡുകൾ നേടുന്നത്. തരുണ്‍ സുധീര്‍ സംവിധാനം ചെയ്തിരിക്കുന്ന ആക്ഷന്‍ ഡ്രാമ ചിത്രമാണ് കാട്ടേര.

ചിത്രം ഡിസംബര്‍ 29 ന് ആയിരുന്നു തിയറ്ററുകളിലെത്തിയത്. കര്‍ണാടകയിലെ 400 തിയേറ്ററുകളിലാണ് ചിത്രം 25 ദിവസം പിന്നിട്ട് റെക്കോർഡ് നേടിയത്. കർണാടകയിൽ നിന്ന് മാത്രമായി ചിത്രം 100 കോടി ക്ലബ്ബില്‍ ഇടംപിടിച്ചുവെന്ന് ബോക്സ് ഓഫീസ് ട്രാക്കര്‍മാരായ കര്‍ണാടക ടാക്കീസ് പറയുന്നു. മൊഴിമാറ്റ പതിപ്പുകൾ ഇല്ലാതെ കന്നഡ ഒറിജിനല്‍ മാത്രമായി എത്തിയ ഒരു കന്നഡ ചിത്രം 100 കോടി ക്ലബ്ബില്‍ ഇടംപിടിക്കുന്നത് ആദ്യമായിട്ടാണെന്നും കർണാടക ടാക്കീസ് അറിയിക്കുന്നു.

കന്നഡയില്‍ നിന്ന് നേരത്തെ എത്തിയ പാന്‍ ഇന്ത്യന്‍ ഹിറ്റുകള്‍ക്കൊന്നും അവകാശപ്പെടാനാവാത്ത നേട്ടമാണ് ഇതെന്നാണ് റിപ്പോർട്ട്. അതേസമയം ചിത്രത്തിന്‍റെ ഒടിടി റിലീസ് തീയതി പ്രഖ്യാപിച്ചു. ഫെബ്രുവരി ഒമ്പതിന് സീ 5 ലൂടെയാണ് ചിത്രം ഒടിടി റിലീസ് ചെയ്യുന്നത്. ആരാധന റാം, ജഗപതി ബാബു, കുമാര്‍ ഗോവിന്ദ്, വിനോദ് കുമാര്‍ ആല്‍വ, ശ്രുതി തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.