Leo Movie: ഇനി അധികം കാത്തിരിക്കണ്ട, വരുന്നു `ലിയോ` ട്രെയിലർ..!! റിലീസ് 19ന്

സിനിമ ആരാധകർ ഏറെ കാത്തിരിക്കുന്ന വിജയ് ചിത്രമാണ് ലിയോ. ലോകേഷ് കനകരാജ് ഒരുക്കുന്ന ചിത്രം ഇതിനോടകം തന്നെ വലിയ ഹൈപ്പ് ഉണ്ടാക്കി കഴിഞ്ഞു. ചിത്രത്തെ സംബന്ധിച്ചുള്ള ഓരോ അപ്ഡേറ്റുകളും ആരാധകർക്ക് ആവേശം നൽകുന്നവയാണ്. ഇപ്പോഴിതാ ചിത്രത്തിന്റെ ട്രെയിലർ റിലീസ് സംബന്ധിച്ചുള്ള അപ്ഡേറ്റെത്തിയിരിക്കുകയാണ്. ഒക്ടോബർ 5ന് ലിയോ ട്രെയിലർ റിലീസ് ചെയ്യുമെന്നാണ് റിപ്പോർട്ട്. പുതിയ പോസ്റ്ററിനൊപ്പമാണ് അണിയറക്കാർ അപ്ഡേറ്റ് പങ്കുവെച്ചിരിക്കുന്നത്.

കഴിഞ്ഞ ദിവസമിറങ്ങിയ ചിത്രത്തിലെ ലിറിക്കൽ വീഡിയോ ഇതിനോടകം യൂട്യൂബിൽ തരം​ഗമായി കഴിഞ്ഞു. ബാഡാസ് എന്ന് തുടങ്ങുന്ന ലിറിക്കൽ ​ഗാനം ട്രെൻഡിങ് നമ്പർ 1 ആയിരുന്നു യൂട്യൂബിൽ. 16 മില്യണിലധികം ആളുകൾ ലിറിക്കൽ വീഡിയോ ഇതിനോടകം കണ്ടുകഴിഞ്ഞു. അനിരുദ്ധ് സം​ഗീതം നൽകി ആലപിച്ച ​ഗാനത്തിന് വരികൾ എഴുതിയത് വിഷ്ണു എടവൺ ആണ്.

ഒക്ടോബർ 19ന് ലിയോ റിലീസ് ചെയ്യും. ​ഗോകുലം ​ഗോപാലന്റെ ശ്രീ ​ഗോകുലം മൂവീസ് ആണ് ചിത്രം കേരളത്തിൽ വിതരണത്തിനെത്തിക്കുന്നത്. ലിയോയുടെ ഓഡിയോ ലോഞ്ച് കഴിഞ്ഞ ദിവസം റദ്ദാക്കിയിരുന്നു. ഓഡിയോ ലോഞ്ച് പാസുകള്‍ക്കായുള്ള വന്‍ ഡിമാന്‍ഡില്‍ സുരക്ഷാകാരണങ്ങള്‍ മുന്‍നിര്‍ത്തിയാണ് ഈ പ്രീ റിലീസ് ഇവന്റ് ഒഴിവാക്കുന്നതെന്നായിരുന്നു നിർമാതാക്കളായ സെവന്‍ സ്ക്രീന്‍ സ്റ്റുഡിയോസ് അറിയിച്ചത്. തീരുമാനത്തിന് പിന്നിൽ രാഷ്ട്രീയ കാരണങ്ങൾ അല്ല എന്നും നിർമാതാക്കൾ വ്യക്തമാക്കിയിരുന്നു.

ലോകേഷ് കനകരാജ് - വിജയ് കൂട്ടുകെട്ടിൽ എത്തുന്ന ചിത്രം എന്നത് തന്നെയാണ് സിനിമയ്ക്ക് ഇത്ര വലിയ ഹൈപ്പ് ലഭിക്കാൻ കാരണം. ചിത്രത്തിന്റെ ഫസ്റ്റ് ലുക്ക് പോസ്റ്ററും, ടീസറും, വിവിധ ഭാഷകളിലുള്ള പോസ്റ്ററുകളും ഇതിനോടകം തന്നെ വൈറലാണ്. സെവൻ സ്‌ക്രീൻ സ്റ്റുഡിയോ, ദി റൂട്ട് എന്നിവയുടെ ബാനറുകളിൽ ലളിത് കുമാറും ജഗദീഷ് പളനിസാമിയും ചേർന്നാണ് ലിയോ നിർമിക്കുന്നത്. തൃഷ, സഞ്ജയ് ദത്ത്, അർജുൻ സർജ, ഗൗതം മേനോൻ, മിഷ്കിൻ, മാത്യു തോമസ്, മൻസൂർ അലി ഖാൻ, പ്രിയ ആനന്ദ്, സാൻഡി, ജനനി, അഭിരാമി വെങ്കിടാചലം, ബാബു ആന്റണി തുടങ്ങി നിരവധി താരങ്ങളാണ് ചിത്രത്തിൽ അണിനിരക്കുന്നത്. ഡി.ഒ.പി : മനോജ് പരമഹംസ, ആക്ഷൻ : അൻപറിവ്, എഡിറ്റിങ് : ഫിലോമിൻ രാജ്.