Level Cross Teaser: വേഷപ്പകർച്ചയിൽ ആസിഫ് അലി, കൂടെ ഷറഫുദ്ദീനും അമല പോളും; `ലെവൽ ക്രോസ്` ടീസറെത്തി

സംവിധായകൻ ജീത്തു ജോസഫ് അവതരിപ്പിക്കുന്ന ഏറ്റവും പുതിയ ചിത്രമാണ് 'ലെവൽ ക്രോസ്'. ചിത്രത്തിന്റെ ടീസർ പുറത്തുവിട്ടു. 55 സെക്കൻഡ് ദൈർഘ്യമുള്ള ചിത്രത്തിന്റെ ടീസർ പ്രേക്ഷകരിൽ ഉദ്വേ​ഗം ജനിപ്പിക്കുന്നതാണ്. ചിത്രത്തിലെ ​ഗാനവും ഫസ്റ്റ് ലുക്കും നേരത്തെ പുറത്തിറങ്ങിയിരുന്നു. ആസിഫ് അലി, ഷറഫുദ്ദീൻ, അമല പോൾ എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. നവാഗതനായ അർഫാസ് അയൂബാണ് ലെവൽ ക്രോസിന്റെ സംവിധായകൻ. ചിത്രം ഉടൻ തിയേറ്ററുകളിലെത്തും.

അഭിഷേക് ഫിലിംസിന്റെ ബാനറിൽ രമേശ് പിള്ളയാണ് സിനിമ നിർമ്മിക്കുന്നത്. അർഫാസ് തന്നെയാണ് ചിത്രത്തിന്റെ രചന നിർവഹിച്ചിരിക്കുന്നത്. സംഭാഷണങ്ങൾ ഒരുക്കിയിരിക്കുന്നത് ആഡം അയൂബാണ്. വിശാൽ ചന്ദ്രശേഖറാണ് ചിത്രത്തിന്റെ സംഗീത സംവിധായകൻ. വിനായക് ശശികുമാറാണ് ഗാനങ്ങൾക്ക് വരി എഴുതിയിരിക്കുന്നത്. അപ്പു പ്രഭാകർ ഛായഗ്രാഹകൻ, ദീപു ജോസഫ് എഡിറ്റർ.

ഒരിക്കലും കേരളത്തിൽ നടക്കാത്ത കഥയാണിതെന്നും അങ്ങനെ അന്വേഷിച്ചാണ് ടുണീഷ്യയിൽ എത്തിയതെന്നുമാണ് സംവിധായകൻ ചിത്രത്തെ കുറിച്ച് പറഞ്ഞത്. ടുണീഷ്യയിൽ ഷൂട്ട് ചെയ്ത ആദ്യ ഇന്ത്യൻ ചിത്രമാണിത്.