Lucky Bhaskar Movie: എട്ട് ദിവസം കൊണ്ട് 80 കോടിക്കടുത്ത്; വിജയം തുടർന്ന് `ലക്കി ഭാസ്കർ`

ദുൽഖർ സൽമാൻ നായകനായി തിയേറ്ററിൽ പ്രദർശനം തുടരുന്ന ലക്കി ഭാസ്കർ ബോക്സ് ഓഫീസിൽ തരം​ഗമാകുന്നു. 8 ദിവസം കൊണ്ട് 74.1 ​കോടി ആ​ഗോള ഗ്രോസ് കളക്ഷനാണ് ചിത്രം സ്വന്തമാക്കിയിരിക്കുന്നത്. പാൻ ഇന്ത്യൻ റിലീസായി എത്തിയ തെലുങ്ക് ചിത്രമാണിത്. വെങ്കി അറ്റ്ലൂരി രചിച്ച് സംവിധാനം ചെയ്ത ചിത്രത്തിൽ ഭാസ്കറായി ദുൽഖറും സുമതിയായി മീനാക്ഷി ചൗധരിയുമാണ് വേഷമിട്ടിരിക്കുന്നത്.

കേരളത്തിൽ നിന്ന് മാത്രം ഇതിനോടകം 10 കോടിക്ക് മുകളിൽ ചിത്രം കളക്ഷൻ നേടിയെന്നാണ് റിപ്പോർട്ടുകൾ. സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്ന് നിർമ്മിച്ച ലക്കി ഭാസ്കർ അവതരിപ്പിച്ചിരിക്കുന്നത് ശ്രീകര സ്റ്റുഡിയോസ് ആണ്. കേരളത്തിലും ഗൾഫിലും ചിത്രം വിതരണം ചെയ്തിരിക്കുന്നത് ദുൽഖർ സൽമാന്റെ വേഫെറർ ഫിലിംസാണ്.

ലക്കി ഭാസ്കറിന്റെ വിജയത്തോടെ തെലുങ്കിൽ ഹാട്രിക് ബ്ലോക്ക്ബസ്റ്ററാണ് ദുൽഖർ സൽമാൻ നേടിയിരിക്കുന്നത്. നാഗ് അശ്വിൻ ഒരുക്കിയ മഹാനടി, ഹനു രാഘവപുടി ഒരുക്കിയ സീതാ രാമം എന്നിവക്ക് ശേഷം ദുൽഖർ സൽമാൻ നായകനായി തെലുങ്കിൽ റിലീസ് ചെയ്ത ചിത്രമാണ് ലക്കി ഭാസ്കർ. ഒരേ സമയം ഫാമിലി ഡ്രാമയും ത്രില്ലറുമായി ഒരുക്കിയ ചിത്രം കുട്ടികളും കുടുംബങ്ങളും യുവാക്കളുമുൾപ്പെടെ എല്ലാത്തരം പ്രേക്ഷകരേയും തൃപ്തിപ്പെടുത്തിയാണ് വിജയം തുടരുന്നത്.