Vettaiyan: വേട്ടയന്റെ ഹ‍ൃദയവും ആത്മാവുമായി മഞ്ജു വാര്യർ; `താര`യെ പരിചയപ്പെടുത്തി അണിയറ പ്രവർത്തകർ

ര‍ജനീകാന്ത് നായകനാകുന്ന വേട്ടയനിലെ മഞ്ജു വാര്യരുടെ കഥാപാത്രത്തെ പരിചയപ്പെടുത്തി അണിയറ പ്രവർത്തകർ. ചിത്രത്തിൽ താര എന്ന കഥാപാത്രത്തെയാണ് മഞ്ജു അവതരിപ്പിക്കുന്നത്. വേട്ടയന്റെ ഹ‍ൃദയവും ആത്മാവും എന്ന വിശേഷണമാണ് താരയ്ക്ക് നൽകിയിരിക്കുന്നത്.

രജനീകാന്തിനും അമിതാഭ് ബച്ചനും ഒപ്പമുള്ള മഞ്ജു വാര്യരുടെ ലൊക്കേഷൻ രം​ഗങ്ങളും അണിയറ പ്രവർത്തകർ പുറത്ത് വിട്ടു. ഏറെ പ്രേക്ഷകപ്രീതി നേടിയ ജയ്ഭീം എന്ന ചിത്രത്തിന് ശേഷം ടി.ജെ ജ്ഞാനവേൽ തിരക്കഥയെഴുതി സംവിധാനം ചെയ്യുന്ന ചിത്രമാണ് വേട്ടയൻ. ദീപാവലിയോടനുബന്ധിച്ച് ഒക്ടോബർ 10ന് ചിത്രം തിയറ്ററുകളിലെത്തും. 

അമിതാഭ് ബച്ചൻ, ഫഹദ് ഫാസിൽ, റാണ ദഗ്ഗുബതി  ദുഷാര വിജയൻ, റിതിക സിം​ഗ് തുടങ്ങി വൻ താരനിരയാണ് വേട്ടയനിൽ അണിനിരക്കുന്നത്. ചിത്രത്തിലെ 'മനസ്സിലായോ' എന്ന ഗാനം റിലീസ് ചെയ്ത് മണിക്കൂറിനുള്ളിൽ തന്നെ ട്രന്റിം​ഗ് ലിസ്റ്റിൽ ഒന്നാമതെത്തിയിരുന്നു. അനിരുദ്ധ് രവിചന്ദറാണ് സൂപ്പർ സ്റ്റാർ രജനീകാന്തിനൊപ്പം മഞ്ജു വാര്യരും ആടി തകർത്ത ഈ ഗാനം ഒരുക്കിയിരിക്കുന്നത്. 

രജനീകാന്തിന്റെ 170-ാമത്തെ ചിത്രമാണ് വേട്ടയൻ. ലൈക്ക പ്രൊഡക്ഷൻസിന്റെ ബാനറിൽ  സുബാസ്കരൻ നിർമ്മിക്കുന്ന സിനിമ തമിഴ്, തെലുങ്ക്, കന്നട, ഹിന്ദി എന്നീ ഭാഷകളിൽ തിയറ്ററുകളിലെത്തും.