Salman Khan Death Threat: ബോളിവുഡ് നടൻ സൽമാൻ ഖാന് വീണ്ടും വധ ഭീഷണി, സുരക്ഷ ശക്തമാക്കി മുംബൈ പോലീസ്

Salman Khan Death Threat: ബോളിവുഡ് നടൻ സൽമാൻ ഖാന് സമൂഹമാധ്യമങ്ങളിലൂടെ  വീണ്ടും വധഭീഷണി.    സൽമാൻ ഖാന് ഗുണ്ടാസംഘം ലോറൻസ് ബിഷ്‌ണോയിയുടെ വധഭീഷണി മുന്‍പും ലഭിച്ചിരുന്നു.

നവംബർ 29 ബുധനാഴ്ച സൽമാൻ ഖാന് ഫേസ്ബുക്ക് പോസ്റ്റിലൂടെ വധ ഭീഷണി ലഭിച്ചതായി വാർത്താ ഏജൻസിയായ എഎൻഐ റിപ്പോർട്ട് ചെയ്തു. സല്‍മാന്‍ ഖാന് വീണ്ടും വധ ഭീഷണി ലഭിച്ചതോടെ താരത്തിന്‍റെ സുരക്ഷ അവലോകനം ചെയ്തതായി മുംബൈ പോലീസ് വ്യക്തമാക്കി. 

ലോറൻസ് ബിഷ്‌ണോയിയുടെ ഗുണ്ടാ സംഘത്തിൽ നിന്നും സൽമാന്‍ ഖാന് മുന്‍പും ഭീഷണി ലഭിച്ചിരുന്നു. ഈ  ഭീഷണികളുമായി ഈ പുതിയ ഭീഷണിക്ക് ബന്ധമുണ്ടോ എന്ന കാര്യത്തിൽ വ്യക്തതയില്ല. ഈ പുതിയ ഭീഷണിയെത്തുടർന്ന് നടന്‍റെ സുരക്ഷ അവലോകനം ചെയ്യുകയും കൂടുതല്‍ ശക്തമാക്കുകയും ചെയ്തു.

സൽമാന്‍ ഖാനുമായുള്ള സൗഹൃദത്തെക്കുറിച്ചുള്ള അഭ്യൂഹങ്ങളുടെ പേരിൽ പഞ്ചാബി ഗായകന്‍ ജിപ്പി ഗ്രെവാളിന്‍റെ കാനഡയിലെ വീടിന് പുറത്ത് ലോറൻസ് ബിഷ്‌നോയിയുടെ സംഘം വെടിയുതിർത്തിരുന്നു. തുടര്‍ന്ന്, താൻ സൽമാന്‍റെ സുഹൃത്തല്ലെന്നും ഒരുമിച്ച് ചില പ്രോജക്ട്ടുകളില്‍ പ്രവര്‍ത്തിച്ചിരുന്നു എന്നും ഗായകന് പ്രസ്താവനയിറക്കേണ്ടി വന്നു. ഗായകന്‍റെ വീടിന് നേരെയുണ്ടായ ആക്രമണത്തിന്‍റെ ഉത്തരവാദിത്തം ലോറൻസ് ബിഷ്‌ണോയി ഫേസ്ബുക്ക് പോസ്റ്റിലൂടെ ഏറ്റെടുക്കുകയും ചെയ്തിരുന്നു. 

ലോറൻസ് ബിഷ്‌നോയ് മുന്‍പ് സൽമാൻ ഖാനോടുള്ള അനിഷ്ടം പ്രകടിപ്പിക്കുകയും അദ്ദേഹത്തിനും പിതാവ് സലിം ഖാനെതിരെയും ഭീഷണികൾ അയയ്ക്കുകയും ചെയ്തിരുന്നു. ഇതോടെ സല്‍മാന്‍ ഖാനും പിതാവ് സലിം ഖാനും മുംബൈ പോലീസ് പ്രത്യേക സുരക്ഷ നല്‍കി വരികയാണ്‌.