Adithattu Movie: കടൽ പോലെ ആഴമുള്ള കഥ; `അടിത്തട്ട്` നാളെ മുതൽ ഒടിടിയിൽ

മികച്ച രണ്ടാമത്തെ സിനിമയ്ക്കുള്ള സംസ്ഥാന അവാർഡ് നേടിയ 'അടിത്തട്ട്' നാളെ മുതൽ ഒടിടിയിൽ സ്ട്രീമിം​ഗ് ആരംഭിക്കുന്നു. ഷൈൻ ടോം ചാക്കോ, സണ്ണി വെയ്ൻ എന്നിവരെ കേന്ദ്ര കഥാപാത്രങ്ങളാക്കി ജിജോ ആന്റണി അണിയിച്ചൊരുക്കിയ ചിത്രം നിരവധി ചലച്ചിത്ര മേഖലകളിൽ പ്രദർശിപ്പിക്കുകയും നിരൂപക പ്രശംസ നേടുകയും ചെയ്തിരുന്നു.

ഉൾക്കടലിലെ ഒരു മത്സ്യബന്ധനബോട്ടിൽ നടക്കുന്ന ത്രസിപ്പിക്കുന്ന സംഭവവികാസങ്ങളാണ് 'അടിത്തട്ടി'ന്റെ പ്രമേയം. 2022 ജൂലൈയിൽ തിയറ്ററുകളിലെത്തിയ അടിത്തട്ട് അഭിനേതാക്കളുടെ പ്രകടനം കൊണ്ടും ദൃശ്യമികവ് കൊണ്ടും ആഴമുള്ള കഥാപാത്രസൃഷ്ടി കൊണ്ടും വ്യത്യസ്തമായ ചലച്ചിത്രാനുഭവമാണ് സമ്മാനിച്ചത്.

മിഡിൽ മാർച്ച് സ്റ്റുഡിയോസും കാനായിൽ ഫിലിംസും ചേർന്ന് അവതരിപ്പിക്കുന്ന ചിത്രം ആമസോൺ പ്രൈമിലും മനോരമ മാക്സിലും നാളെ മുതൽ സ്ട്രീമിം​ഗ് ആരംഭിക്കും. ജയപാലൻ, പ്രശാന്ത് അലക്സാണ്ടർ, മുരുകൻ മാർട്ടിൻ, ജോസഫ് യേശുദാസ്, സാബുമോൻ എന്നിവരാണ് മറ്റ് പ്രധാനവേഷങ്ങളിൽ എത്തുന്നത്.

ഖൈസ് മില്ലെൻ രചന നിർവ്വഹിച്ച ചിത്രത്തിന്റെ ക്യാമറ പാപ്പിനുവാണ്. എഡിറ്റിം​ഗ്: നൗഫൽ അബ്ദുള്ള, സം​ഗീതം: നസ്സർ അഹമ്മദ്, ശ്രീഹരി, ശബ്ദമിശ്രണം: സിനോയ് ജോസഫ്, സംഘട്ടനം ഫീനിക്സ് പ്രഭു.