Actor Rajendra Prasad`s Daughter Dies: തെലുങ്ക് നടൻ രാജേന്ദ്ര പ്രസാദിന്റെ മകൾ അന്തരിച്ചു; അന്ത്യം ഹൃദയാഘാതം മൂലം

ഹൈദരാബാദ്: പ്രശസ്ത തെലുങ്ക് നടൻ രാജേന്ദ്ര പ്രസാദിന്റെ മകൾ ഗായത്രി(38) അന്തരിച്ചു. ഹൃദയാഘാതത്തെ തുടർന്ന് ശനിയാഴ്ച പുലർച്ചെയാണ് അന്ത്യം. നെഞ്ചുവേദനയെ തുടർന്ന് ഗായത്രിയെ വെള്ളിയാഴ്ച രാത്രി ആശുപത്രിയിൽ പ്രവേശിപ്പിച്ചിരുന്നു. ഹൈദരാബാദിലെ എഐജി ആശുപത്രിയിൽ ചികിത്സയിലിരിക്കെ ഹൃദയാഘാതത്തെ തുടർന്നായിരുന്നു ​ഗായത്രിയുടെ അന്ത്യം.  

സിനിമ ചിത്രീകരണത്തിനിടെയാണ് രാജേന്ദ്ര പ്രസാദ് വാർത്ത അറിഞ്ഞ് ആശുപത്രിയിലെത്തിയത്. അന്ത്യകർമങ്ങൾ പിന്നീട് ഹൈദരാബാദിൽ നടക്കും. ബാലതാരമാണ് ഗായത്രിയുടെ മകൾ സായ് തേജസ്വിനി. താരങ്ങളായ പവൻ കല്യാൺ, നാനി, അല്ലു അർജുൻ, ജൂനിയർ എൻടിആർ  തുടങ്ങി നിരവധി താരങ്ങൾ ദുഃഖം രേഖപ്പെടുത്തി. 

തെലുങ്ക് സിനിമാ  മേഖലയിലെ പ്രശസ്ത കൊമേഡിയനാണ് രാജേന്ദ്ര പ്രസാദ്. തെലുങ്ക്, തമിഴ് ഉൾപ്പടെ നൂറോളം സിനിമകളിൽ താരം അഭിനയിച്ചിട്ടുണ്ട്. പ്രഭാസിന്റെ ‘കൽക്കി’ എന്ന ചിത്രത്തിൽ റൂമി എന്ന കഥാപാത്രത്തെ അവതരിപ്പിച്ചിരുന്നു.