Thalapathy Vijay’s GOAT Song: സ്വന്തം റെക്കോ‍ർഡുകൾ തൂക്കി വീണ്ടും ദളപതി; യൂട്യൂബ് കത്തിച്ച് `വിസിൽ പോട്`

ആരാധകർ ഏറെ ആകാംക്ഷയോടെ കാത്തിരിക്കുന്ന വിജയ് ചിത്രമാണ് ദ ​ഗ്രേറ്റസ്റ്റ് ഓഫ് ഓൾ ടൈം. വെങ്കട് പ്രഭുവും വിജയും ആദ്യമായി ഒന്നിക്കുന്ന ചിത്രം കൂടിയാണ് ​ഗോട്ട്. സയൻസ് ഫിക്ഷൻ ജോണറിൽ ഒരുങ്ങുന്ന ചിത്രത്തിന്റെ ഫസ്റ്റ് ലുക്ക് പോസ്റ്ററിനും സെക്കൻഡ് ലുക്ക്  പോസ്റ്ററിനും വലിയ സ്വീകാര്യതയാണ് ലഭിച്ചത്. പോസ്റ്ററുകളിൽ വിജയ് രണ്ട് ​ഗെറ്റപ്പുകളിലാണ് എത്തുന്നത്.

തമിഴ് പുതുവർഷത്തിൽ ചിത്രത്തിലെ ആദ്യത്തെ ​ഗാനം റിലീസ് ചെയ്തിരുന്നു. പാട്ടിന് വൻ സ്വീകാര്യതയാണ് ലഭിച്ചിരിക്കുന്നത്. യുവാൻ ശങ്കർ രാജ സം​ഗീതം നൽകിയ ​ഗാനം ആലപിച്ചിരിക്കുന്നത് ദളപതിയാണ്. വിസിൽ പോട് എന്ന ​ഗാനത്തിൽ വിജയ്ക്കൊപ്പം പ്രഭുദേവ, പ്രശാന്ത്, അജ്മൽ അമീർ എന്നിവരും ചുവടുവയ്ക്കുന്നു. മദൻ കർക്കിയാണ് ​ഗാനം രചിച്ചിരിക്കുന്നത്.

പാട്ട് റിലീസ് ചെയ്ത് 24 മണിക്കൂർ പിന്നിട്ടപ്പോൾ യൂട്യൂബ് റെക്കോർഡുകളെല്ലാം തകർത്തുകൊണ്ടിരിക്കുകയാണ്. 24 മണിക്കൂറിനുള്ളിൽ ഏറ്റവും അധികം ആളുകൾ കണ്ട സൗത്ത് ഇന്ത്യൻ ​ഗാനമെന്ന റോക്കോർഡാണ് വിസിൽ പോട് സ്വന്തമാക്കിയത്. 24.7 മില്യൺ ആളുകളാണ് വിസിൽ പോട് യൂട്യൂബിൽ കണ്ടത്. രണ്ടാം സ്ഥാനത്തും മറ്റൊരു വിജയ് ​ഗാനമാണ്. 23.7 മില്യൺ കാഴ്ചക്കാരുമായി അറബിക് കുത്താണ് രണ്ടാം സ്ഥാനത്ത്.

ആദ്യ അഞ്ച് സ്ഥാനങ്ങളിലുള്ള പാട്ടുകളിൽ നാലും വിജയുടേതാണ്. മഹേഷ് ബാബു ചിത്രമായ ​ഗുണ്ടൂർ കാരത്തിലെ ദം മസാല എന്ന പാട്ട് മാത്രമാണ് തമിഴിന് പുറത്ത് നിന്ന് സൗത്തിൽ ഏറ്റവും അധികം ആളുകൾ കണ്ട പാട്ടിന്റെ പട്ടികയിൽ കയറിയത്. ഏറ്റവും അധികം കാഴ്ചക്കാരെ നേടിയതിനൊപ്പം ഏറ്റവും വേ​ഗത്തിൽ 1.25 മില്യൺ ലൈക്കുകളും വിസിൽ പോട് നേടി. ചിത്രം സെപ്തംബർ അഞ്ചിന് തിയേറ്ററുകളിലെത്തും.

ബി​ഗിലിന് ശേഷം വിജയ് ഡബിൾ റോളിൽ എത്തുന്ന ചിത്രമാണ് ​ഗോട്ട്. ചിത്രത്തിൽ സ്നേഹ, മീനാക്ഷി ചൗധരി, പ്രശാന്ത്, പ്രഭുദേവ, അജ്മൽ അമീർ, ലൈല, യോ​ഗി ബാബു എന്നിവരാണ് ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കുന്നത്. സിദ്ധാർത്ഥ സുനി ചിത്രത്തിന്റെ ഛായാ​ഗ്രഹണവും വെങ്കട് രാജൻ എഡിറ്റിങ്ങും നിർവഹിക്കുന്നു. എജിഎസ് എന്റർടെയ്ൻമെന്റ്സിന്റെ ബാനറിൽ അർച്ചന കൽപ്പാത്തിയാണ് ചിത്രം നിർമിക്കുന്നത്.