സിരുത്തൈ ശിവയുടെ സംവിധാനത്തിൽ സൂര്യ നായകനായി എത്തുന്ന ബിഗ് ബജറ്റ് ചിത്രമാണ് കങ്കുവ. സിനിമയുടെ പ്രഖ്യാപനം മുതൽ വലിയ ആവേശത്തിലാണ് ആരാധകർ. ചിത്രത്തിന്റെ ടീസറും ശ്രദ്ധേയമായിരുന്നു. ടീസറിന് മികച്ച പ്രേക്ഷക പ്രതികരണമാണ് ലഭിച്ചത്. പീരിയഡ് ഡ്രാമ വിഭാഗത്തിലാണ് ചിത്രം ഒരുങ്ങുന്നതെന്നാണ് റിപ്പോർട്ടുകൾ വ്യക്തമാക്കുന്നത്.
ഇപ്പോഴിതാ, കങ്കുവയുടെ പുതിയ പോസ്റ്റർ പങ്കുവച്ചിരിക്കുകയാണ് സൂര്യ. വിഷുവും അംബേദ്കർ ജയന്തിയും പ്രമാണിച്ചാണ് പുതിയ പോസ്റ്റർ സൂര്യ പങ്കുവച്ചത്. താരത്തിന്റെ ഇൻസ്റ്റഗ്രാം പേജിലൂടെയാണ് പോസ്റ്റർ പങ്കുവച്ചത്. ചിത്രത്തിൽ സൂര്യ ഇരട്ട വേഷത്തിലാണ് എത്തുകയെന്നാണ് പോസ്റ്റർ നൽകുന്ന സൂചന.
പോസ്റ്ററിൽ രണ്ട് ഗെറ്റപ്പുകളിലാണ് സൂര്യയെ കാണാൻ സാധിക്കുക. വാളേന്തി നിൽക്കുന്ന യോദ്ധാവും തോക്ക് പിടിച്ചു നിൽക്കുന്ന അധോലോക നായകനുമാണ് പോസ്റ്ററിലുള്ളത്. രണ്ട് കാലഘട്ടങ്ങളിലെ കഥാപാത്രങ്ങളായിരിക്കും ഇതെന്നാണ് സൂചന.
ഭൂതകാലവും വർത്തമാനവും കൂട്ടിമുട്ടുന്നിടത്ത് ഒരു പുതിയ ഭാവി ആരംഭിക്കുമെന്ന കുറിപ്പോടെയാണ് സിനിമയുടെ നിർമാതാക്കളായ സ്റ്റുഡിയോ ഗ്രീൻ പോസ്റ്റർ റിലീസ് ചെയ്തിരിക്കുന്നത്. ബോളിവുഡ് താരം ദിഷ പഠാണിയാണ് ചിത്രത്തിൽ നായിക. മുപ്പത്തിയെട്ടോളം ഭാഷകളിലാണ് ചിത്രം റിലീസ് ചെയ്യുന്നത്.
വിവേകയും മദൻ കർക്കിയും ചേർന്നാണ് ചിത്രത്തിലെ ഗാനങ്ങൾ രചിച്ചിരിക്കുന്നത്. സംഘട്ടന സംവിധാനം നിർവഹിച്ചിരിക്കുന്നത് സുപ്രീം സുന്ദറാണ്. യുവി ക്രിയേഷൻസിന്റെ ബാനറിൽ വംശി പ്രമോദും സ്റ്റുഡിയോ ഗ്രീനിന്റെ ബാനറിൽ കെഇ ജ്ഞാനവേൽ രാജയും ചേർന്നാണ് ചിത്രത്തിന്റെ നിർമാണം. ആയിരം വർഷങ്ങൾക്ക് മുമ്പുള്ള കാലഘട്ടത്തിലെ കഥ പറയുന്ന കങ്കുവയിൽ ഒരു യോദ്ധാവിന്റെ വേഷത്തിലാണ് സൂര്യ എത്തുന്നത്. 350 കോടി രൂപയാണ് ചിത്രത്തിന്റെ ബഡ്ജറ്റ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ... ios Link - https://apple.co/3hEw2hy
