Valimai Video Song: `ഇത് വേറെ മാരി ഇറുക്ക്`; വലിമൈ ചിത്രത്തിലെ `നാങ്ക വേറെ മാരി` വീഡിയോ ഗാനം പുറത്ത്

അജിത് ചിത്രം വലിമൈ ഗംഭീര കളക്ഷൻ നേടി മൂന്നാം ആഴ്ചയിലേക്ക് പ്രദർശനം തുടരുകയാണ്. ചിത്രത്തിന് മികച്ച അഭിപ്രായം തന്നെയാണ് ആരാധകരുടെയും കുടുംബപ്രേക്ഷകരുടെയും ഭാഗത്ത് നിന്ന് ലഭിക്കുന്നത്. ചിത്രത്തിൽ അജിത്തിന്റെ ബൈക്ക് സ്റ്റണ്ട് രംഗങ്ങൾ എടുത്ത് സൂചിപ്പിക്കേണ്ടതാണ്. വലിമൈയുമായി ബന്ധപ്പെട്ട് ഇറങ്ങുന്ന അപ്ഡേറ്റുകൾ എല്ലാം ആരാധകർ ഏറ്റെടുത്തിരുന്നു. ചിത്രത്തിലെ ഒരു ​ഗാനമാണ് ഇപ്പോൾ പുറത്തു വന്നിരിക്കുന്നത്.

"നാങ്ക വേറെ മാരി" എന്ന വീഡിയോ ഗാനമാണ് അണിയറ പ്രവർത്തകർ പുറത്ത് വിട്ടിരിക്കുന്നത്. ഗാനത്തിന്റെ ലിറിക്കൽ വീഡിയോ റിലീസ് ചെയ്തപ്പോൾ ഇരുകൈയ്യും നീട്ടിയാണ് അജിത് ആരാധകർ സ്വീകരിച്ചത്. വീഡിയോ ഗാനം റിലീസ് ചെയ്യുമ്പോൾ അജിത്തിന്റെ ഡാൻസ് സ്റ്റെപ്പുകളും എനർജിയും ആരാധകരെ ആവേശം കൊള്ളിക്കുന്നത്.

യുവൻശങ്കർ രാജയും അനുരാഗ് കുൽക്കർണിയും ചേർന്നാണ് ഗാനം ആലപിച്ചിരിക്കുന്നത്. വിഘ്‌നേശ് ശിവനാണ് ഗാനരചയിതാവ്. യുവൻ ശങ്കർ രാജ തന്നെയാണ് സംഗീത സംവിധാനം നിർവഹിച്ചിരിക്കുന്നത്. ചതുരംഗ വേട്ടൈ, ധീരൻ അധികാരം ഒന്ന്, നേർകൊണ്ട പാർവൈ എന്നീ സൂപ്പർ ഹിറ്റ് ചിത്രങ്ങളൊരുക്കിയ എച്ച്. വിനോദിന്റെ നാലാമത്തെ ചിത്രമാണ് വലിമൈ. 

ഫെബ്രുവരി 24നായിരുന്നു ചിത്രം റിലീസ് ചെയ്തിരുന്നത്. ബോണി കപൂറാണ് ചിത്രത്തിന്റെ നിർമാണം. ഹുമ ഖുറേഷിയാണ് ചിത്രത്തിൽ നായികയായി എത്തിയത്. അജിത്ത് ഒരു നീണ്ട ഇടവേളയ്ക്ക് ശേഷമാണ് പോലീസ് വേഷത്തിലെത്തുന്നത്.