Kuwait Emir : കുവൈത്ത് അമീർ ശൈഖ് നവാഫ് അൽ അഹ്മദ് അൽ ജാബിർ അസ്സബാഹ് അന്തരിച്ചു

കുവൈത്ത് സിറ്റി : കുവൈത്ത് അമീർ ശൈഖ് നവാഫ് അൽ അഹ്മദ് അൽ ജാബിർ അസ്സബാഹ് അന്തരിച്ചതായി അമീരി കോടതി അറിയിച്ചു. 86 വയസായിരുന്നു. ആരോഗ്യ പ്രശ്നങ്ങളെ തുടർന്ന് ശൈഖ് നവാഫ് ചികിത്സിയിലായിരുന്നു. കുവൈത്തിന്റെ 16-ാമത് അമീറായിരുന്നു ശൈഖ് നവാഫ്. 2020ലാണ് ശൈഖ് നവാഫ്, ശൈഖ് സബാഹ് അൽ അഹ്മദ് അൽ സഭയുടെ മരണത്തിന് ശേഷം കുവൈത്തിന്റെ അമീറായി ചുമതലയേൽക്കുന്നത്.

നവംബറിലാണ് ആരോഗ്യ പ്രശ്നങ്ങളെ തുടർന്ന് ശൈഖ് നവാഫിനെ ആശുപത്രിയിൽ പ്രവേശിക്കുന്നത്. മറ്റ് വിശദീകരണങ്ങളൊന്നും നൽകിയില്ലെങ്കിലും ശൈഖ് നവാഫിന്റെ ആരോഗ്യ സ്ഥിതി മെച്ചപ്പെട്ടുയെന്ന് പിന്നീട് കെയുഎൻഎ വാർത്ത ഏജൻസി അറിയിച്ചിരുന്നു.

ശൈഖ് നവാഫിന്റെ മരണത്തെ തുടർന്ന് കുവൈത്തിൽ 40 ദിവസത്തെ ദുഃഖാചരണം പ്രഖ്യാപിച്ചു. കൂടാതെ മൂന്ന് ദിവസത്തേക്ക് സർക്കാർ, അർധ-സർക്കാർ, പൊതുമേഖല സ്ഥാപനങ്ങൾക്ക് അവധി പ്രഖ്യാപിക്കുകയും ചെയ്തു. ശൈഖ് മിഷൽ അൽ അഹ്മദ് അസ്സബാഹിന് കുവൈത്തിന്റെ പുതിയ അമീറായി തിരഞ്ഞെടുത്തു.