FIFA World Cup 2022: നെതർലൻഡ്സിനെ തകർത്ത് അർജന്റീന സെമിയിൽ; ഷൂട്ടൗട്ടിൽ ഹീറോയായി എമിലിയാനോ, സെമിയിൽ ക്രൊയേഷ്യയെ നേരിടും
FIFA World Cup 2022: നെതർലന്റ്സിന്റെ രണ്ട് കിക്കുകൾ സേവ് ചെയ്ത അർജന്റീന ഗോളി എമിലിയാനോ മാര്‍ട്ടിനസ് ഷൂട്ടൗട്ടിലെ ഹീറോയായി മാറുകയായിരുന്നു.
ദോഹ: ഖത്തര്‍ ലോകകപ്പിന്റെ ക്വാർട്ടർ മത്സരത്തിൽ നെതർലൻഡ്സിനെ വീഴ്ത്തി അർജന്റീന സെമിയിൽ. രണ്ടാം ക്വാര്‍ട്ടറില്‍ നെതര്‍ലന്‍ഡ്‌സിനെ പെനാല്‍റ്റി ഷൂട്ടൗട്ടില്‍ 4-3ന് തോല്‍പിച്ച് കൊണ്ടാണ് മെസ്സിയും കൂട്ടരും സെമിയിലേക്ക് കടന്നത്. അർജന്റീനയ്ക്കായി ക്യാപ്റ്റൻ ലയണൽ മെസ്സി, ലിയാൻഡ്രോ പരേദസ്, ഗോൺസാലോ മോണ്ടിയെൽ, ലൗട്ടാരോ മാർട്ടിനസ് എന്നിവർ ഷൂട്ടൗട്ടിൽ ഗോൾ അടിച്ചു. എന്നാൽ എൻസോ ഫെർണാണ്ടസിന്റെ കിക്ക് പുറത്തുപോയി. നെതർലൻഡ്സ് ക്യാപ്റ്റൻ വിർജിൻ വാൻ ദെയ്ക്, സ്റ്റീവൻ ബെർഗ്യൂസ് എന്നിവരുടെ കിക്കുകൾ തടഞ്ഞ അര്‍ജന്‍റീന ഗോളി എമിലിയാനോ മാര്‍ട്ടിനസ് ഷൂട്ടൗട്ടിലെ ഹീറോയായി.
ഇരു ടീമും 120 മിനിറ്റുകളിലും രണ്ട് വീതം ഗോളടിച്ച് സമനിലയിൽ എത്തിയതോടെയാണ് മത്സരം ഷൂട്ടൗട്ടിലേക്ക് നീങ്ങിയത്. അതിന് മുമ്പ് ഒരു ഗോളും അസിസ്റ്റുമായി മെസി അര്‍ജന്‍റീനക്കായും ഇരട്ട ഗോളുമായി വൗട്ട് നെതര്‍ലന്‍ഡ്‌സിനായും തിളങ്ങി. ആദ്യ മിനിറ്റുകളിൽ നതർലൻഡ്സ് മുന്നിട്ട് നിന്നിരുന്നു. ആദ്യപകുതിയിൽ നഹുവേൽ മൊളീന നേടിയ ഗോളാണ് അർജന്റീനയ്ക്ക് കരുത്തായത്. മെസ്സിയുടെ പാസിൽ നിന്നാണ് മൊളീന ലക്ഷ്യം കണ്ടത്. മത്സരത്തിന്റെ 35–ാം മിനിറ്റിലായിരുന്നു മൊളീനയുടെ ഗോൾ. ഡിസംബർ 13ന് നടക്കുന്ന സെമിഫൈനലിൽ ക്രൊയേഷ്യയുമായാണ് അർജന്റീനയുടെ പോരാട്ടം. ആദ്യ ക്വാർട്ടറിൽ ബ്രസീലിനെ പെനൽറ്റി ഷൂട്ടൗട്ടിൽ തോൽപ്പിച്ചാണ് ക്രൊയേഷ്യ സെമിയിലെത്തിയത്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...