Asian Champions Trophy 2024: ഏഷ്യൻ ചാമ്പ്യൻസ് ട്രോഫി; ഹോക്കിയിൽ ഇന്ത്യയ്ക്ക് കിരീടം, ചൈനയെ തോൽപ്പിച്ചു

ഹോക്കി ഏഷ്യന്‍ ചാമ്പ്യന്‍സ് ട്രോഫിയില്‍ കിരീട നേട്ടവുമായി ഇന്ത്യ. ഫൈനലില്‍ ചൈനയെ പരാജയപ്പെടുത്തിയാണ് ഇന്ത്യ കിരീടം നേടിയത്. ചൈനയ്ക്കെതിരെ ഏകപക്ഷീയമായ ഒരു ​ഗോളിനാണ് ഇന്ത്യയുടെ ജയം. ആദ്യത്തെ മൂന്ന് ക്വാർട്ടറുകൾ ​ഗോൾരഹിതമായിരുന്നു. നാലാം ക്വാർട്ടറിലാണ് ഇന്ത്യ ​ഗോൾ നേടിയത്.

ജു​ഗ് രാജ് സിം​ഗാണ് ഇന്ത്യയ്ക്കായി ​ഗോൾ നേടിയത്. ഏഷ്യന്‍ ചാമ്പ്യന്‍സ് ട്രോഫിയിലെ ഇന്ത്യയുടെ അഞ്ചാം കിരീടമാണിത്. ആദ്യമായി ഫൈനല്‍ കളിക്കാനിറങ്ങിയ ചൈന നിരാശയോടെ മടങ്ങി. തുടക്കം മുതൽ ചൈന മികച്ച നീക്കങ്ങൾ നടത്തിയെങ്കിലും ഇന്ത്യ ശക്തമായി പ്രതിരോധിച്ചു.

ആദ്യ ക്വാർട്ടറിൽ ലഭിച്ച രണ്ട് പെനാൽറ്റി കോർണറുകൾ മുതലാക്കാൻ ഇന്ത്യയ്ക്കായില്ല. രണ്ടാം ക്വാർട്ടറിൽ ഇന്ത്യ ശക്തമായ നീക്കങ്ങൾ നടത്തിയെങ്കിലും ചൈന പ്രതിരോധം തീർത്തു. മൂന്ന് ക്വാർട്ടറുകളും ​ഗോൾരഹിതമായി അവസാനിച്ചു.

നാലാം ക്വാർട്ടറിൽ ആക്രമിച്ച് കളിച്ച ഇന്ത്യ അമ്പത്തിയൊന്നാം മിനിറ്റിൽ ​ഗോൾ നേടി. തിരിച്ചടിക്കാനുള്ള ചൈനയുടെ ശ്രമങ്ങളെ ഇന്ത്യ ശക്തമായി പ്രതിരോധിച്ചു. ഏഷ്യന്‍ ചാമ്പ്യന്‍സ് ട്രോഫി ചരിത്രത്തിലെ ഏറ്റവും കൂടുതല്‍ കിരീടങ്ങള്‍ എന്ന റെക്കോര്‍ഡ് ഇന്ത്യയ്ക്കാണ്.