Rachin Ravindra: രചിന്റെ പേരിന് സച്ചിനും ദ്രാവിഡുമായി ബന്ധമില്ല; പ്രചാരണം തള്ളി പിതാവ്

മുംബൈ: ഏകദിന ലോകകപ്പിൽ ന്യൂസിലൻഡിന്റെ മിന്നും താരമായി മാറിയിരിക്കുകയാണ് ഇന്ത്യൻ വംശജനായ രചിൻ രവീന്ദ്ര. കീവീസിനെ സെമി ഫൈനലിലേയ്ക്ക് മുന്നിൽ നിന്ന് നയിച്ചത് രചിന്റെ മാസ്മരിക ബാറ്റിംഗായിരുന്നു. ലോകകപ്പിലെ റൺവേട്ടക്കാരിൽ വിരാട് കോഹ്ലിയ്ക്കും ക്വിന്റൺ ഡീകോക്കിനും പിന്നിൽ മൂന്നാമതാണ് രചിൻ. 9 ഇന്നിംഗ്‌സുകളിൽ നിന്ന് 70.62 ശരാശരിയിൽ 565 റൺസാണ് രചിൻ അടിച്ചുകൂട്ടിയത്. 

രചിൻ ലോകകപ്പ് ടീമിൽ ഇടംനേടിയത് മുതൽ സമൂഹ മാധ്യമങ്ങളിൽ രചിന്റെ പേരുമായി ബന്ധപ്പെട്ട ഒരു പ്രചാരണം നടന്നിരുന്നു. ഇന്ത്യയുടെ ഇതിഹാസ താരങ്ങളായ സച്ചിൻ ടെണ്ടുൽക്കർ, രാഹുൽ ദ്രാവിഡ് എന്നിവരുടെ പേരുകൾ കൂട്ടിയിണക്കിയാണ് രചിന് മാതാപിതാക്കൾ പേരിട്ടത് എന്നായിരുന്നു ആ പ്രചാരണം. മാതാപിതാക്കൾ കടുത്ത ദ്രാവിഡിന്റെയും സച്ചിന്റെയും കടുത്ത ആരാധകരാണെന്നുള്ള പ്രചാരണം കൂടി എത്തിയതോടെ എല്ലാവരും ഇത് വിശ്വസിച്ചു.

ഇപ്പോൾ ഇതാ രചിന്റെ പേരിന് പിന്നിലുള്ള വസ്തുത എന്താണെന്ന് തുറന്നുപറഞ്ഞിരിക്കുകയാണ് രചിന്റെ പിതാവ് രവി കൃഷ്ണമൂർത്തി. സച്ചിന്റെയും ദ്രാവിഡിന്റെയും പേരുകളുമായി രചിന്റെ പേരിന് ബന്ധമില്ലെന്ന് അദ്ദേഹം വ്യക്തമാക്കി. ഭാര്യയാണ് മകന് രചിൻ എന്ന പേര് നിർദ്ദേശിച്ചത്. നല്ല പേരായതിനാലും ചെറുതും സ്‌പെല്ലിംഗ് എളുപ്പമായതിനാലും തനിയ്ക്കും ഈ പേര് ഇഷ്ടമായി. പിന്നീടാണ് ഇതിഹാസ താരങ്ങളുടെ പേരുമായുള്ള ബന്ധം ശ്രദ്ധയിൽപ്പെട്ടതെന്നും മകനെ ക്രിക്കറ്റ് താരമാക്കണമെന്ന് അന്ന് ചിന്തിച്ചിരുന്നില്ലെന്നും അദ്ദേഹം വ്യക്തമാക്കി. 

ബെംഗളൂരുവിൽ വേരുകളുള്ള രവിയും കുടുംബവും കഴിഞ്ഞ 30 വർഷത്തിലേറെയായി ന്യൂസിലൻഡിലാണ് താമസം. 23കാരനായ രചിൻ 2021ലാണ് അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ചത്. ന്യൂസിൽഡിന് വേണ്ടി ഇതിനോടകം തന്നെ 21 ഏകദിനങ്ങളും 18 ടി20 മത്സരങ്ങളും 3 ടെസ്റ്റ് മത്സരങ്ങളും രചിൻ കളിച്ചു കഴിഞ്ഞു.