Donald Trump : ക്യാപിറ്റോൾ ആക്രമണത്തിനായി ട്രംപ് പ്രേരിപ്പിച്ചു; പ്രസിഡന്റ് തിരഞ്ഞെടുപ്പിൽ മത്സരിക്കാനാകില്ല; വിലക്കേർപ്പെടുത്തി കോടതി

Trump Disqualified To Contest Presidential Election 2024: അമേരിക്കൻ പ്രസിഡന്റ് സ്ഥാനത്തേക്ക് മത്സരിക്കാൻ ഡൊണാൾഡ് ട്രംപിന് വിലക്കേർപ്പെടുത്തി യുഎസിലെ കൊളറാഡോ സുപ്രീം കോടതി. ഇതോടെ അടുത്ത വർഷം നടക്കുന്ന റിപ്പബ്ലിക്കൻ പാർട്ടിയുടെ പ്രസിഡന്റ് സ്ഥാനാർഥിത്വത്തിലേക്കുള്ള പ്രാഥമിക തിരഞ്ഞെടുപ്പിൽ പോലും ട്രംപിന് മത്സരിക്കാൻ സാധിക്കില്ല. 2021 ജനുവരി ആറിന് യുഎസ് ക്യാപിറ്റോളിൽ ട്രംപ് അനുകൂലികൾ നടത്തിയ ആക്രമണത്തിൽ മുൻ അമേരിക്കൻ പ്രസിഡന്റിന് പങ്കുണ്ടെന്ന് കണ്ടെത്തിയതിന് പിന്നാലെയാണ് കോടതിയുടെ നടപടി. ട്രംപിന്റെ പ്രസംഗം അനുകൂലികളെ ആക്രമണം നടത്താൻ പ്രേരിപ്പിച്ചതായി കോടതി കണ്ടെത്തി.

എന്നാൽ ട്രംപിനെതിരെയുള്ള വിലക്ക് നിലവിൽ വന്നിട്ടില്ല. മുൻ യുഎസ് പ്രസഡിന്റെ സ്റ്റേറ്റ് സുപ്രീം കോടതിയെ സമീപിക്കാൻ ജനുവരി നാല് വരെ സാവകാശമുണ്ട്. അതിന് ശേഷമാകും കോളറാഡോ കോടതിയുടെ വിധി നിലവിൽ വരും. അതേസമയം ഈ ചരിത്രവിധി ട്രംപി രാഷ്ട്രീയഭാവിക്ക് കനത്ത തിരിച്ചടിയാണ് സൃഷ്ടിച്ചിരിക്കുന്നത്. ജനുവരി അഞ്ചിന് മുമ്പ് കേസിൽ സ്റ്റേറ്റ് സുപ്രീം കോടതിയുടെ വിധി വന്നാൽ മാത്രമെ റിപ്പബ്ലിക്കൻ പാർട്ടിയുടെ പ്രാഥമിക തിരഞ്ഞെടുപ്പിൽ ട്രംപിന് മത്സരിക്കാൻ സാധിക്കൂ. മാർച്ച് അഞ്ചിന് നടക്കുന്ന തിരഞ്ഞെടുപ്പിന് ജനുവരി അഞ്ചിന് നാമനിർദേശം സമർപ്പിക്കേണ്ടതാണ്.

കോളറാഡോയിലെ ഒരുകൂട്ടം വോട്ടര്‍മാരും സിറ്റിസണ്‍സ് ഫോര്‍ റെസ്‌പോണ്‍സിബിലിറ്റി ആന്‍ഡ് എത്തിക്‌സും ചേര്‍ന്നാണ് ട്രംപിനെതിരേ കോടതിയെ സമീപിച്ചത്. കലാപത്തിലും അക്രമങ്ങളിലും മറ്റും ഉൾപ്പെട്ടവരെ അധികാര സ്ഥാനങ്ങളിൽനിന്നു വിലക്കുന്ന 14-ാം ഭേദഗതിയുടെ മൂന്നാം വകുപ്പു പ്രകാരമാണ് വിധി.പ്രക്ഷോഭത്തിലോ കലാപത്തിലോ പങ്കെടുക്കുന്നവര്‍ അധികാരത്തിലെത്തുന്നത് തടയാനുള്ള യുഎസ് ഭരണഘടനയിലെ വ്യവസ്ഥ വളരെ അപൂര്‍വമായി മാത്രമാണ് പ്രയോഗിക്കാറുള്ളത്.