Liam Payne: `വൺ ഡയറക്ഷൻ` ഗായകന് ദാരുണാന്ത്യം; ബാൽക്കണിയിൽ നിന്ന് പുറത്തേക്ക് ചാടിയതെന്ന് പ്രാഥമിക നി​ഗമനം

ബ്രിട്ടീഷ് ഗായകൻ ലിയാം പെയ്നിനെ (31) മരിച്ച നിലയിൽ കണ്ടെത്തി. അർജന്റീനൻ തലസ്ഥാനമായ ബ്യൂണസ് ഐറിസിലുള്ള കാസ സർ ഹോട്ടലിന്റെ മൂന്നാം നിലയിൽ നിന്ന് വീണ് മരിച്ച നിലയിലാണ് കണ്ടെത്തിയത്. ബുധനാഴ്ച വൈകിട്ടായിരുന്നു അപകടം.

ലിയാം മദ്യമോ മയക്കുമരുന്നോ ഉപയോ​ഗിച്ചിരുന്നതായി അധികൃതർ അറിയിച്ചു. മുറിയുടെ ബാൽക്കണിയിൽ നിന്ന് പുറത്തേക്ക് ചാടിയതെന്നാണ് പ്രാഥമിക നി​ഗമനം. 

പ്രശസ്ത ബ്രിട്ടീഷ് ബോയ് ബാൻഡ് വൺ ഡയറക്ഷനിലൂടെ ശ്രദ്ധ നേടിയ ​ഗായകനായിരുന്നു ലിയാം. സെപ്റ്റംബർ 30ന് കാമുകി കെയിറ്റ് കാസിഡിയയോടൊപ്പം അർജന്റീനയിൽ അവധിക്കാലം ചെലവഴിക്കാനെത്തിയതെന്നാണ് വിവരം. എന്നാൽ ഈ മാസം 14ന് കാമുകി തിരിച്ച് പോകുകയും ലിയാം അർജന്റീനയിൽ തന്നെ തുടരുകയുമായിരുന്നു.

മുൻ കാമുകി മായ ഹെന്റിയുമായി ബന്ധപ്പെട്ട നിയമപ്രശ്നങ്ങളെ തുടർന്ന് ലിയാം സമ്മർദ്ദത്തിലായിരുന്നുവെന്നാണ് റിപ്പോർട്ട്. മോഡലും എഴുത്തുക്കാരിയുമായിരുന്നു മായ ഹെന്റി. 2022ലാണ് ഇരുവരും വേർപിരിഞ്ഞത്. 

ദി എക്സ് ഫാക്ടർ എന്ന റിയാലിറ്റി ഷോയിലൂടെ വന്ന താരങ്ങൾ ഒന്നിച്ച് 2010ൽ രൂപീകരിച്ച ബാൻഡായിരുന്നു വൺ ഡയറക്ഷൻ. 2015ൽ ബാൻഡ് വേർപിരിയൽ പ്രഖ്യാപിച്ചതിന് പിന്നാലെ സോളോ ആൽബങ്ങളുമായി ലിയാം എത്തി. പുതിയ സോളോ ആൽബത്തിന്റെ പണിപ്പുരയിലിരിക്കെയാണ് അപ്രതീക്ഷിത മരണം.