बाईकच्या टँकमध्ये पेट्रोल ऐवजी दारू! चंद्रपुरमधील पोरांचा जुगाड पाहून पोलिसही चक्रावले

चंद्रापूर मध्ये दारु तस्करांनी लढवलेली शक्कल पाहून पोलिसांनी डोक्याला हात लावला आहे. बाईकच्या पेट्रोल टँकमधून दारु तस्करी करण्यात येत होती.

Chandrapur News : बाईकच्या टँकमध्ये पेट्रोल ऐवजी दारू भरण्यात आली आहे. चंद्रपुरचा एक व्हिडिओ व्हायरल झाला आहे. पोलिसांनी बाईकद्वारे दारू तस्करी करण्यात येत होती. गडचिरोली जिल्ह्यातील चामोर्शी पोलिसांनी पकडली ही बाईक पकडली आहे. पोलिसांनी या प्रकरणी दोन आरोपींना अटक केली आहे. सध्या या अजब दारु तस्करीची चंद्रपुरमध्ये जोरदार चर्चा रंगली आहे. 

गडचिरोली जिल्ह्यातील दारूबंदी आहे. दारुबंदी असलेल्या गडचिरोली जिल्ह्यात दारूची छुप्या मार्गाने वाहतूक करण्यासाठी वेगवेगळ्या शक्कल लढविल्या जातात. अशाच दोन बहाद्दर युवकांनी बाईकच्या पेट्रोल टँकमध्ये पेट्रोल ऐवजी चक्क दारूच्या बाटल्या लपवल्याचे आढळले आहे. दोन आरोपी चामोर्शी येथे मोटरसायकलने दारूची वाहतूक करत होते. याची कुणकुण लागताच पोलिसांनी चामोर्शीतील जुन्या आदिवासी मुलींच्या वसतिगृहाजवळ सापळा लावून त्या दोघांना ताब्यात घेतले. 

बाईकच्या पेट्रोल टँकमधून एकामागोमाग एक दारूच्या बाटल्या निघतच असल्याने टँकमध्ये पेट्रोल आहे की नाही, आणि नसेल तर गाडी चालत कशी होती, असा प्रश्न पोलिसांना पडला होता.  पेट्रोल टँक गाडीच्या सीटखाली बनवण्यात आल्याचे दिसून आले. पेट्रोल पुरवठ्याचा पाईप तेथून इंजिनला जोडलेला होता. दारूची वाहतूक करण्यासाठी या बहाद्दरांनी लढविलेली ही शक्कल पाहून चामोर्शी ठाण्याचे पोलिसही चक्रावून गेले. बाईक आणि दारूच्या बाटल्या जप्त करून दोघांवरही गुन्हा दाखल करण्यात आला आहे.

407 मेटॅडोरमध्ये दारू लपवली

चंद्रपूर आणि वर्धा या दारुबंदी असलेल्या जिल्ह्यांमध्ये दारु पोहोचवण्यासाठी तस्करांकडून वेगवेगळे मार्ग शोधले जातायत. 407 मेटॅडोरमध्ये खाली स्लायडिंग प्लेट लाऊन त्यात दारू लपवून चंद्रपूर मध्ये तस्करीचा भंडाफोड यवतमाळ पोलिसांच्या स्थानिक गुन्हे शाखेनं केला. गोपनीय माहितीवरुन पोलिसांनी या वाहनाची तपासणी केली असता वरवर काहीही दिसत नसलं तरी ट्रॉलीखाली एक स्लायडिंग प्लेट निदर्शनास आली. ही प्लेट सरकवली असता आत दारूचे बॉक्स आढळले.

रुग्णवाहिकेतून दारूची तस्करी

चंद्रपूर शहरात रुग्णवाहिकेतून दारूची तस्करी होत असल्याचं उघडकीस आले होते.  शहरातील बाबूपेठ भागात रामनगर पोलिसांनी कारवाई करत अवैध दारु जप्त केली होती. यवतमाळहुन चंद्रपुरात ही दारु आणली जात होती, जवळपास 6 लाखाच्या दारुसह 16 लाख 85 हजारांचा मुद्देमाल य़ावेळी जप्त करण्यात आला. याप्रकरणी यवतमाळ जिल्ह्यातील रहिवासी असलेल्या राहुल वानखेडे याला अटक करण्यात आली.