மது பிரியர்களே! இன்று முதல் 3 நாட்களுக்கு டாஸ்மாக் கடைகளுக்கு விடுமுறை!

தமிழ்நாட்டில் மொத்தம் 4,829 டாஸ்மாக் கடைகள் உள்ளது. இதன் மூலம் ஒரு நாளும் சுமார் 100 முதல் 120 கோடி ரூபாய் வரை வருமானம் பெறுகிறது தமிழக அரசு. இந்த பணத்தின் மூலம் அரசு முக்கிய திட்டங்களுக்கு செலவு செய்கிறது.     

தமிழகத்தில் தீபாவளி, பொங்கல் என பெரிய பண்டிகைகள் எது நடந்தாலும், டாஸ்மாக் கடைகள் எப்போதும் மூடப்படுவதில்லை. இருப்பினும் தமிழகத்தில் டாஸ்மாக் கடைகளுக்கு ஆண்டுதோறும் 8 நாட்கள் விடுமுறை அளிக்கப்படுகிறது. 

திருவள்ளுவர் தினம், குடியரசு தினம், மகாவீர் ஜெயந்தி, வடலூர் ராமலிங்கர் நினைவு தினம், மே தினம், சுதந்திர தினம், நபிகள் நாயகம் பிறந்த நாள், காந்தி ஜெயந்தி போன்ற சிறப்பு நாட்களில் டாஸ்மாக் கடைகளுக்கு விடுமுறை அளிக்கப்படுகிறது. 

மேலும் குரு பூஜை போன்ற விசேஷங்களுக்கு அந்தந்த பகுதிகளில் சட்டம் ஒழுங்கு பிரச்சனையை சரி செய்ய சில மாவட்டங்களுக்கு மட்டும் டாஸ்மாக் கடைகள் விடுமுறை அளிக்கப்படுகிறது. 

அந்த வகையில் கன்னியாகுமரி மாவட்டம் நாகர்கோவில் சவேரியார் கோயிலில் பெரிய திருவிழா நடைபெற உள்ளதால் இன்று முதல் மூன்று நாட்களுக்கு டாஸ்மாக் கடைகள் மூடப்படும். 

கன்னியாகுமரி மாவட்டம் சவேரியார் கோவில் பகுதியில் உள்ள டாஸ்மாக் கடைகள், மதுபான பார்கள், ஓட்டல் பார்கள் என மதுபானம் விற்கப்படும் இடங்கள் அனைத்தும் மூடப்படும் என ஆட்சியர் முடிவு செய்துள்ளார். இன்று டிசம்பர் 1 ஆம் தேதி தொடங்கி டிசம்பர் 3 ஆம் தேதி வரை இந்த விடுமுறை நீடிக்கும்.