கிறிஸ்துமஸூக்கு இயேசுவிடம் குவார்ட்டர் கேட்டு வாங்கிய குடிமகன்: வீடியோ வைரல்

இந்த கிறிஸ்துமஸூக்கு குமரியில் இருந்து இப்படி ஒரு கோரிக்கை வரும் என்று கனவிலும் நினைத்து பார்த்திருக்கமாட்டார் இயேசு. குடும்ப கஷ்டம், கல்யாணம், உடல் ஆரோக்கியம் குறித்தெல்லாம் கோடிக்கணக்கான வேண்டுதல்களை வைக்கும் மக்களுக்கு மத்தியில், பார்டி வேண்டும் என்ற கோரிக்கையை வைத்து இயேசுவிடம் முறையிட்டிருக்கிறார் குடிமகன் ஒருவர். என்னோட பிறந்தநாளுக்கு நான் ட்ரீட் வைக்கிறேன், உன்னோட பிறந்தநாளுக்கு நீ ட்ரீட் வைக்க மாட்டியா? என உரிமையோடு இயேசுவிடம் கேட்டிருக்கிறார் அந்த குடிமகன். 

கடந்த ஞாயிற்றுக்கிழமை உலகம் முழுவதும் கிறிஸ்துமஸ் விழா வெகு விமரிசையாக கொண்டாடப்பட்டது. தமிழகத்திலும் தேவாலயங்களில் விடியவிடிய சிறப்பு வழிபாடு மற்றும் கூட்டு வழிபாடுக்கு ஏற்பாடு செய்யப்பட்டு குடும்பம் குடும்பமாக மக்கள் சென்று பங்கேற்றனர். பின்னர், புத்தாடை அணிந்து, விருந்து ஏற்பாடு செய்து உறவினர்களுடன் கிறிஸ்துமஸை கொண்டாடினர். குமரியை சேர்ந்த இந்த குடிமகனும் அப்படி தான் கொண்டாடி இருந்திருக்கிறார். குடும்பத்துடன் விழாவை சிறப்பித்த அவர், பின்னர் நண்பர்களுடன் கிறிஸ்துமஸ் கொண்டாட சென்றிருக்கிறார்.