'टाईमपास' फेम दगडू आणि विशाखा सुभेदारला म्हाडाची लॉटरी

मुंबई: 'टाईमपास' चित्रपटातील दगडूची भूमिका साकारणारा प्रथमेश परब आणि विनोदी अभिनेत्री विशाखा सुभेदार यांना यंदा म्हाडाचं घर मिळालंय. आज रंगशारदामध्ये झालेल्या लॉटरीमध्ये या दोघांना घर मिळालं. 

१ लाख २५ हजार ८८४ अर्जदारांपैकी कोणाला मुंबईत हक्काचं घर मिळतं याकडे सर्वच अर्जदारांचं लक्ष लागलं होतं. टाईमपास फेम प्रथमेश परबला म्हाडा पावली असून त्याचं मुंबईत हक्काचं घर साकारण्याचं स्वप्न आज पूर्ण झालं. प्रथमेश परबला कलाकार वर्गात प्रतीक्षानगर इथल्या मध्य उत्पन्न गटातील घराची लॉटरी लागली आहे. 

तर अभिनेत्री विशाखा सुभेदारला कलाकार गटात मुलुंडच्या गवाणपाडा इथल्या मध्य उत्पन्न गटातील घराची लॉटरी लागली. 

अत्यंत हलाखीच्या परिस्थितीतून प्रथमेश मराठी सिनेसृष्टीत आला असून प्रथमेशला घर मिळाल्यानं परब कुटुंबांमध्ये आनंदाचं वातावरण आहे. प्रथमेश सध्या चित्रिकरणासाठी परदेशात असून प्रथमेशची आई प्रिया परब रंगशारदामध्ये उपस्थित होत्या. प्रथमेशच्या ऐवढ्या वर्षाच्या कष्टाचं चीज झालं अशी प्रतिक्रिया त्यांनी दिली.

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.