આ મ્યુચ્યુઅલ ફંડે રોકાણકારોને કર્યા માલામાલ... આવી રીતે બન્યા 10 લાખના 7 કરોડ

Mutual Fund: છેલ્લા કેટલાક અઠવાડિયાથી શેરબજારમાં જોરદાર ઘટાડો જોવા મળી રહ્યો છે. દરરોજ અનેક શેરોમાં લોઅર સર્કિટ જોવા મળી રહી છે. લોકોના મ્યુચ્યુઅલ ફંડનું મૂલ્ય પણ નેગેટિવ થઈ ગયું છે. જો કે, આજે અમે તમને જે મ્યુચ્યુઅલ ફંડ વિશે જણાવી રહ્યા છીએ તેણે રોકાણકારોના લાખો રૂપિયાને કરોડો રૂપિયામાં ફેરવી દીધા છે. ચાલો તમને તેના વિશે વિગતવાર જણાવીએ.

10 લાખ 7.26 કરોડમાં ફેરવાયા
અમે જેની વાત કરી રહ્યા છીએ તે ICICI પ્રુડેન્શિયલ મલ્ટી એસેટ ફંડ છે. કોઈપણ રોકાણકાર જેણે 22 વર્ષ પહેલા તેમાં 10 લાખ રૂપિયાનું રોકાણ કર્યું હતું, આજે તેના રૂપિયા 7.26 કરોડ થઈ ગયા છે. જ્યારે નિફ્ટી 200 TRI વિશે વાત કરીએ તો તે જ સમયગાળામાં રૂ. 10 લાખના માત્ર રૂ. 3.36 કરોડ જ થયા છે.  ICICI પ્રુડેન્શિયલ મલ્ટી એસેટ ફંડમાં 31 ઓક્ટોબર 2002ના રોજ કરવામાં આવેલ રૂ. 10 લાખનું રોકાણ 30 સપ્ટેમ્બર 2024 સુધી વાર્ષિક 21.58 ટકાના ચક્રવૃદ્ધિ દરે વધ્યું છે. જ્યારે બેન્ચમાર્ક નિફ્ટી 200 TRIમાં સમાન રોકાણે આ સમયગાળામાં માત્ર 17.39 ટકા વળતર આપ્યું છે.

જો તમે SIP કર્યું તો તમને કેટલું વળતર મળ્યું?
જો કોઈ રોકાણકારે ICICI પ્રુડેન્શિયલ મલ્ટી એસેટ ફંડમાં માસિક રૂ. 10,000નું રોકાણ કર્યું હોય, તો 22 વર્ષમાં તે રૂ. 2.9 કરોડ થઈ ગયા છે. જો કે, આ સમયગાળા દરમિયાન રોકાણકારનું મૂળ રોકાણ માત્ર 26.4 લાખ રૂપિયા છે. તેનો અર્થ એ કે રોકાણકારને આશરે CAGR 18.37 ટકાના દરે વળતર મળ્યું. જ્યારે આ સમયગાળા દરમિયાન બેન્ચમાર્ક નિફ્ટી 200 TRIમાં કરવામાં આવેલ સમાન રોકાણે 14.68 ટકાના દરે વળતર આપ્યું છે.

સ્થાનિક મ્યુચ્યુઅલ ફંડ્સ કરે છે મોટા પ્રમાણમાં રોકાણ
એક તરફ સામાન્ય માણસ બજારના ઘટાડાથી પરેશાન છે અને રોકાણ કરવાનું ટાળી રહ્યો છે. બીજી તરફ સ્થાનિક મ્યુચ્યુઅલ ફંડ્સ બ્લુ-ચિપ શેરોમાં ભારે ખરીદી કરી રહ્યા છે. નેશનલ સિક્યોરિટીઝ ડિપોઝિટરી લિમિટેડ (NSDL)ના ડેટા અનુસાર વિદેશી સંસ્થાકીય રોકાણકારો (FII)એ ઓક્ટોબર 2024માં રૂ. 94,000 કરોડથી વધુનું વેચાણ કર્યું હતું, જ્યારે મ્યુચ્યુઅલ ફંડ્સે એ જ મહિનામાં ઇક્વિટી માર્કેટમાં રૂ. 92,000 કરોડથી વધુની ખરીદી કરી હતી. નોંધનીય છે કે, મ્યુચ્યુઅલ ફંડ્સે નિફ્ટીના ટોપ 15 શેરોમાં લગભગ 45,000 કરોડ રૂપિયાની ખરીદી કરી છે. જ્યારે મહિન્દ્રા એન્ડ મહિન્દ્રાના શેરમાં સૌથી વધુ ખરીદી જોવા મળી હતી.