અમદાવાદમાં લંપટ શિક્ષકે ધો.12ની યુવતીની ક્લાસમાં રોકી, વિધાર્થીના અંગો પર હાથ ફેરવ્યો, પણ બૂમ પાડતા જ....

ઉદય રંજન/અમદાવાદ: રાજ્યમાં છેડતીના બનાવો વધી રહ્યા છે, ત્યારે સરસપુરમાં લંપટ શિક્ષકે વિદ્યાર્થીનીને ભણાવવાના બહાને છેડતી કરી છે. સગીરાએ પરિવારને જાણ કરતા પોલીસે આરોપીની ધરપકડ કરીને કાયદાકીય કાર્યવાહી હાથ ધરી છે. પોલીસ કસ્ટડીમાં લીધેલા આરોપી લંપટ શિક્ષક અજય સોલંકી છે. જેને ગુરુ અને વિધાર્થીના સંબંધને લાંછન લાગે તેવું કૃત્ય કર્યું છે અને જેલના સળિયા પાછળ ધકેલાયો છે. 

આ ઘટનાની મળતી માહિતી પ્રમાણે, સરસપુર વિસ્તારમાં રહેતી એક વિધાર્થીની ધોરણ 12માં અભ્યાસ કરે છે અને એક્સ તરીકે પરીક્ષા આપવાની હતી. છેલ્લા 3 વર્ષથી અજય સોલંકી પાસે ટ્યુશન કલાસમાં જતી હતી. 9 જાન્યુઆરીના રોજ આરોપી અજય સોલંકીએ અભ્યાસના નામે સગીરાને રોકી હતી અને ત્યારબાદ સગીરા સાથે શારીરિક છેડછાડ કરી હતી. સગીરાએ પરિવારને શિક્ષકની કરતૂત જણાવતા પરિવારે શહેર કોટડા પોલીસ સ્ટેશનમાં ફરિયાદ નોંધાવતા પોલીસે આરોપીની ધરપકડ કરી છે.

આરોપી અજય સોલંકી ચાંદખેડામાં ભાડે રહે છે અને છેલ્લા 7 વર્ષથી સરસપુરમાં ટ્યુશન કલાસીસ ચલાવે છે. તેના ક્લાસમાં મોટી સંખ્યામાં વિદ્યાર્થીઓ ભણે છે. આરોપી અજય સોલંકીની નજર સગીરા પર બગડી હતી અને તેને ભણાવવાના નામે રોકી હતી અને બીજા વિદ્યાર્થીઓને મોકલી દીધા હતા. ત્યારબાદ વિધાર્થીની સાથે શારીરિક અડપલાં કરતા વિધાર્થીએ બૂમ પાડતા આરોપીએ છોડી દીધી હતી.

આ સગીરા એટલી ગભરાઈ ગઈ કે તે ગુમસુમ થઈ ગઈ. પરિવારે તપાસ કરતા ટ્યુશન ક્લાસના શિક્ષકે તેને એકલી રોકી હોવાનું જાણવા મળ્યું. જેથી પરિવારે સગીરાની પૂછપરછ કરતા તેને શિક્ષકની કરતૂત જણાવી હતી. જેને લઈને પરિવારે પોલીસ ફરિયાદ નોંધાવતા આરોપીની પોલીસે ધરપકડ કરી હતી.

શહેર કોટડા પોલીસે લંપટ શિક્ષક એવા અજય સોલંકીની ધરપકડ કરીને તેને કોર્ટમાં રજૂ કરીને વધુ તપાસ શરૂ કરી છે. આ આરોપીએ અન્ય કોઈ વિધાર્થીની સાથે આવું કંઈ કર્યું છે કે નહિ તે મુદ્દે વધુ પૂછપરછ હાથ ધરવામાં આવી છે.