ફિલ્મોમાં જોવા મળે તેવી મારામારી ધાનેરામાં થઈ, બે ગ્રૂપ લાકડીઓ લઈને એકબીજા પર તૂટી પડ્યા

Banaskantha news : ધાનેરાના ધરણોધર ગામે જમીન અદાવતમાં બે સમાજના લોકો વચ્ચે ધીંગાણું થયું હતું. ખેતરમાં કામ કરી રહેલા એક પરિવારના લોકો ઉપર ટોળાએ લાકડી ધોકા અને તીક્ષ્ણ હથિયારો લઈને તૂટી પડ્યા હતા. તેઓએ પરિવાર પર હિંસક હુમલો કર્યો હતો. બંને સમાજના લોકો વચ્ચે હિંસક મારામારી થતાં 3 મહિલાઓ સહિત આઠ લોકો ઈજાગ્રસ્ત થયા છે. ઇજાગ્રસ્તોને સારવાર માટે હોસ્પિટલમાં ખસેડાયા છે. ખેતરમાં ખેલાયેલા ધીંગાણાના વીડિયો વાયરલ થયા છે. ધાનેરા પોલીસે સામસામે 12 લોકો સામે ફરિયાદ નોંધી વધુ તપાસ હાથ ધરી છે. 

પ્રાપ્ત માહિતી અનુસાર, બનાસકાંઠા જિલ્લાના ધાનેરા તાલુકાના ધરણોધર ગામે જમીન બાબતે બે જૂથ વચ્ચે ધીંગાણું સર્જાયું હતું. બુધવારે જમીન મામલે થયેલી બોલાચાલી બાદ મામલો ઉગ્ર બન્યો હતો. જેને કારણે બે જૂથના લોકો સામસામે આવી ગયા હતા. ફિલ્મોમાં જોવા મળે તેવી લડાઈ જોવા મળી હતી. જેનો વીડિયો ત્યાં હાજર કેટલાક લોકોએ ઉતાર્યો હતો.