સુરત : કેમિકલ કંપનીમાં લાગેલી આગનો ધુમાડો એક કિમી સુધી પ્રસર્યો, 6 કલાક બાદ પણ બેકાબૂ

ચેતન પટેલ/સુરત :સુરતમાં સચીન જીઆઈડીસીમાં આવેલ એક કેમિકલ કંપનીમાં મોડી સાંજે આગ લાગી હતી. અંબિકા ઈન્ડસ્ટ્રીઝમાં આવેલી કલરટેક્સ કંપનીમાં આગ લાગતા આગના ગોટેગોટા હવામાં ઉડ્યા હતા. એક કિલોમીટર સુધી આગના ગોટેગોટા ફેલાયા હતા. ફાયરની ટીમ તાત્કાલિક ઘટના સ્થળ પહોંચી ગઈ હતી. 

કલરટેક્સ કંપનીમાં આગને પગલે ફાયરની 6 ગાડીઓ રવાના કરાઈ હતી. જેન બાદ વધુ ગાડીઓ બોલાવવામાં આવી હતી. આગ કાબૂમાં ન આવતા 8 ફાયરની ગાડી ઘટના સ્થળે પહોંચી ગઈ હતી. સચિન તથા સચિન હોજીવાળાની ફાયર, ONGC કંપનીની ફાયર ટીમ પણ બોલાવાઈ હતી. ફાયર વિભાગના સૂત્રોના જણાવ્યા અનુસાર, આગ બૂઝવતા બીજા 5 થી 6 કલાક થશે. આ આગમાં બે ટેમ્પા બળીને ખાખ થઈ ગયા હતા. 

કંપનીમા લાગેલી આગ એટલી વિકરાળ હતી કે, આસપાસની કંપનીઓમાં પણ આગ ફેલાઈ ગઈ હતી. જોકે, કેમિકલની કંપની હોવાથી આગ બૂઝવવામાં વિલંબ થયો હતો. તેમજ કેમિકલને કારણે આગ પણ વધુ પ્રસરી ગઈ હતી. કેમિકલ કંપનીમાં આગ ક્યા કારણોસર લાગી તે અંગે ચોક્કસ માહિતી મળી રહી નથી. આગ શોર્ટ સર્કિટથી લાગી હોવાનું હાલ પ્રાથમિક તબક્કે કહેવામાં આવી રહ્યું છે.