પ્રેમિકાની પત્નીને ધમકી, ‘અમે પોલીસ ખાતામાં છીએ, તારાથી થાય તે કરી લે, તારો પતિ મારા અંકુશમાં છે’

મૌલિક ધામેચા/અમદાવાદ :અમદાવાદ ગ્રામ્ય મહિલા પોલીસ સ્ટેશનમાં પોલીસકર્મી પતિ વિરુદ્ધ તેની જ પત્ની એ ફરિયાદ કરી છે. ફરિયાદમાં એવો આક્ષેપ કરવામાં આવ્યો છે કે, પોલીસકર્મી પતિ અન્ય કોઈ મહિલા પોલીસકર્મી સાથે લગ્નેત્તર સબંધ રાખે છે. આ પોલીસકર્મી ગ્રામ્ય એલસીબીમાં ડ્રાઈવર તરીકે ફરજ બજાવે છે, જેને બાવળા પોલીસ સ્ટેશનની એક મહિલા પોલીસકર્મી સાથે પ્રેમ સંબંધ હોવાથી પત્નીને ત્રાસ આપી હેરાન પરેશાન કરે છે. પોલીસકર્મીએ હદ વટાવીને પત્ની અને બાળક હોવા છતાં ખાખીધારી પ્રેમિકા સાથે લગ્ન કરી લીધા હોવાનો પણ પત્નીએ ફરિયાદમાં આક્ષેપ કર્યો છે. 

મહિલાએ પોતાની ફરિયાદમાં લખાવ્યું કે, પતિની પ્રેમિકાએ તો તેને એવી ધમકી આપી કે, અમે પોલીસ ખાતામાં છીએ. તારાથી થાય તે કરી લે અને તારો પતિ મારા અંકુશમાં હોવાની ધમકી પણ આપી હતી. સાણંદમાં રહેતા આ પોલીસકર્મીનાં 15 વર્ષ પહેલા નિવૃત્ત જેલ અધિક્ષકની દીકરી સાથે લગ્ન થયા હતા. લગ્ન બાદ બંન્નેનું જીવન સુખેથી ચાલતું હતું, પણ મહિલાનો પતિ પાંચેક વર્ષ પહેલા પોલીસ ખાતામાં જોડાયો હતો. બાદમાં ધોળકા પોલીસ સ્ટેશનમાં ફરજ બજાવતી મહિલા પોલીસકર્મી સાથે પ્રેમ સંબંધ રચાયો હતો. 

બાદમાં પોલીસ કર્મી પતિએ પ્રેમિકા સાથે લગ્ન પણ કરી લીધા હોવાનું પણ પત્નીને જાણવા મળ્યું હતું. જોકે આ બાબતે પોલીસ કોન્સ્ટેબલને પત્નીએ પૂછતા દર મહિને પિયરમાંથી એક-એક લાખ લઈ આવવા દબાણ કરવામાં આવતું હતું. જેને લઇ કંટાળી ગ્રામ્ય મહિલા પોલીસ સ્ટેશનમાં પત્નીએ ફરિયાદ આપતા પોલીસે તપાસ હાથ ધરી છે.