‘વિજય રૂપાણી મારા માસા છે’ કહીને રાજકોટમાં એક યુવકે યુવતીને બેફામ ગાળો ભાંડી

ઝી મીડિયા/બ્યૂરો :રાજકોટમાં એક અજીબોગરીબ કિસ્સો સામે આવ્યો છે. એક યુવતી સાથે જીભાજોડી કરવાના કેસમાં સીએમ રૂપાણીનું નામ આવ્યું છે. રાજકોટમાં એક યુવતીની સાઈકલને એક યુવકે ટક્કર મારી હતી. જેના બાદ યુવકે દબંગાઈ ઠોકતા કહ્યું કે, મુખ્યમંત્રી મારા માસા છે અને પોલીસ અધિકારીઓ મારા પિતાના મિત્ર છે. આમ, હાલ રાજકોટનો આ કિસ્સો ચર્ચાના ચગડોળે ચઢી છે. 

પ્રાપ્ત માહિતી અનુસાર, રાજકોટના નિર્મલા રોડ પર બનેલો આ કિસ્સો છે. રાજકોટમાં મુખ્યમંત્રી અને ઉચ્ચ પોલીસ અધિકારીનું નામ લઈને એક યુવતીને અપશબ્દો બોલતા યુવાનનો વીડિયો વાયરલ થયો છે. વીડિયોમાં યુવાન પોતાનું નામ પાર્થ જસાણી છે તેવું જણાવી રહ્યો છે. સાથે જ કહે છે કે, વિજય રૂપાણી મારા માસા છે. પોલીસમાં પણ ઓળખાણ હોવાનો દાવો કરી યુવકે યુવતીને અપશબ્દો કહ્યાં છે. યુવકને રોકવાનો પ્રયાસ કરવામાં આવે છે, પરંતુ તે રોકાતો નથી. બેફામ અપશબ્દો બોલતો યુવક એવું પણ કહે છે કે, મારી તો પોલીસમાં ઓળખાણ છે, તને તકલીફ પડી જશે. અને ડી.સી.પી. કક્ષાના પોલીસ અધિકારીઓ પણ પોતાના સગા હોવાનું તે વીડિયોમાં જણાવી રહ્યો છે. હાજર લોકોએ કારચાલકને શાંત પાડવા પ્રયાસ કર્યો હતો, પરંતુ તે વધુ ઉશ્કેરાયો હતો અને યુવતીને માફી માગવા દબાણ કરતો હતો.