રાજકોટમાં સાંજે 7થી સવારે 7 સુધી બહાર નિકળવા પર પ્રતિબંધ

રક્ષિત પંડ્યા/રાજકોટઃ રાજકોટ જિલ્લામાં અત્યાર સુધી કોરોના વાયરસના 62 કેસ સામે આવ્યા છે. મોટા ભાગના કેસો રાજકોટ શહેરમાં આવ્યા છે. હવે આ સંક્રમણને રોકવા માટે તંત્ર દ્વારા અનેક પગલાઓ લેવામાં આવી રહ્યાં છે. આ અંગે રાજકોટ પોલીસ કમિશનરે નવું જાહેરનામું બહાર પાડ્યું છે. આ નવા જાહેરનામા પ્રમાણે કોઈપણ લોકો સાંજે સાત કલાકથી સવારે 7 કલાક સુધી ઘરની બહાર નિકળી શકશે નહીં. તો આ સમય દરમિયાન તમામ દુકાનો પણ બંધ રહેશે.

પોલીસ કમિશનરનું જાહેરનામું
રાજકોટ પોલીસ કમિશનરના નવા જાહેરનામા પ્રમાણે શહેરમાં કોરોના વાયરસના વધતા કેસોને રોકવા માટે દરેક લોકો સાંજે 7 કલાકથી સવારે 7 કલાક સુધી ઘરની બહાર નિકળી શકશે નહીં. આ દરમિયાન તમામ દુકાનો પણ બંધ રહેશે. રાજકોટ હાલ ઓરેન્જ ઝોનમાં છે, પરંતુ તંત્ર દ્વારા કડક અમલ કરાવવામાં આવી રહ્યો છે. પોલીસ કમિશનરે કહ્યું કે, સાંજે 7 કલાક પછી જો કોઈ કારણ વગર બહાર જોવા મળશે તો તેની સામે કડક કાર્યવાહી કરવામાં આવશે. સાંજે સાત કલાક બાદ માત્ર મેડિકલ સ્ટોર ખુલ્લા રહી શકશે. 

સાંજે 7 કલાક બાદ સામાન્ય લોકો માટે પેટ્રોલ પણ પણ બંધ
શહેરમાં કોરોના વાયરસ રોકવા માટે રાજકોટ પેટ્રોલ પંપ એસોસિએશન દ્વારા પણ એક મહત્વપૂર્ણ નિર્ણય લેવામાં આવ્યો છે. સાંજે 7 કલાકથી સવારે 7 કલાક સુધી સામાન્ય લોકોને વાહનમાં પેટ્રોલ ભરી આપવામાં આવશે નહીં. આ દરમિયાન માત્ર એમ્બ્યુલન્સ, પોલીસના વાહન તથા અન્ય ઇમરજન્સી સેવામાં રોકાયેલા વાહનોમાં પેટ્રોલ ભરી આપવામાં આવશે.