અજીબોગરીબ કિસ્સો! નશાની હાલતમાં બાળકને રમાડતી વખતે યુવક નીચે પટકાતા કરૂણ મોત, બાળકનો ચમત્કારી બચાવ

પ્રશાંત ઢીવરે/સુરત: નશાની હાલતમાં બાળકને રમાડતી વખતે બાળક સાથે યુવક નીચે પટકાતા યુવકનું મોત નીપજ્યું છે. યુવક ઘરના બીજા માળે બાળકને રમાડતો હતો. અચાનક બાળક સાથે નીચે પટકાઈ જવાથી યુવકનું મોત નીપજતા પરિવાર શોકમાં ગરકાવ થઇ ગયો હતો. 

મૂળ ઝારખંડનો વતની અને હાલમાં લીંબાયત સ્થિત સંતોષ નગરમાં રહેતો મુકેશ શાહુ રીક્ષા ચલાવી પરિવારનું ગુજરાન ચલાવતો હતો. તે પડોશમાં રહેતા બાળકને લઈને ઘરના બીજા માળે રમાડી રહ્યો હતો આ દરમ્યાન તે બાળક સાથે નીચે પટકાતા તે ગંભીર રીતે ઈજાગ્રસ્ત થયો હતો. તેને સારવાર અર્થે હોસ્પિટલ ખસેડવામાં આવ્યો હતો જ્યાં સારવાર દરમ્યાન મુકેશનું મોત નીપજ્યું છે. મૃતક મુકેશ પરણિત છે અને બે વર્ષ પહેલા જ તેના લગ્ન થયા હતા તેના મોતને લઈને પરિવાર શોકમાં ગરકાવ થઇ ગયો હતો. આ ઘટનામાં બાળકનો ચમત્કારી બચાવ થયો હતો. 

મિત્ર રવિ કુમાર દાસે જણાવ્યું હતું કે, મુકેશ નશાની હાલતમાં હતો અને તે પાડોશીના બાળકને છત પર રમાડી રહ્યો હતો, તે દરમ્યાન તે નીચે પટકાયો હતો અને તેને હોસ્પિટલ ખસેડવામાં આવ્યો હતો. જ્યાં સારવાર દરમ્યાન તેનું મોત નીપજ્યું હતું. બાળકને વધુ ઈજાઓ થઇ ન હતી.