અમદાવાદ : બેડરૂમમાં મહિલાની ગોળી વાગેલી લાશ મળી, પતિ ફરાર, હત્યા કે આત્મહત્યા?

જાવેદ સૈયદ/અમદાવાદ :અમદાવાદના ઓઢવ વિસ્તારમાં એક મહિલાનું ગોળી વાગતા મોત થયુ છે. એક તરફ કહેવાય છે કે, આ મહિલાએ બીમારીથી કંટાળીને આત્મહત્યા કરી છે, પરંતુ મહિલાના મોત બાદ પતિ ફરાર હોવાથી આ હત્યા છે કે આત્મહત્યા તે વિશે અનેક તર્કવિતર્કો સર્જાયા છે. 

પ્રાપ્ત માહિતી અનુસાર, અમદાવાદના ઓઢવ વિસ્તારમાં આવેલ શ્રેયા એપાર્ટમેન્ટમાં આજે અનિતા વર્મા નામની મહિલાનો મૃતદેહ મળી આવ્યો હતો. માઉઝર પિસ્તોલથી મહિલાને ગોળી વાગી હોવાનું પોલીસનું તારણ છે. આ અંગે સૌથી પહેલા તેના બાળકોને ખબર પડી હતી. તેથી તેમણે કાકાને આ વાતની જાણ કરી હતી. જેઓ તાત્કાલિક દોડી આવ્યા હતા. કાકાએ આ અંગે પોલીસને જાણ કરતા પોલીસ ઘટનાસ્થળે પહોંચી હતી. મહિલાએ દેશી બનાવટની બંદૂકથી ગોળી મારીને આત્મહત્યા હોવાનું કહેવાય છે. આ વિશે કાકાનું કહેવુ છે કે, તેમના ભાભી માનસિક રીતે લાંબા સમયથી અસ્વસ્થ હતા અને તેમની સારવાર ચાલી રહી હતી. તેથી બીમારીથી કંટાળીને તેમણે આત્મહત્યા કરી હતી.

આમ, આ હત્યા છે કે આત્મહત્યા તે દિશામાં પોલીસે તપાસ શરૂ કરી છે. તેમજ મહિલાનો પતિ ક્યાં ગયો અને કેમ ફરાર થયો તે વિશે પણ તપાસ શરૂ કરી છે. તો બીજી તરફ, મહિલા પાસે આત્મહત્યા કરવા માટે પિસ્તોલ ક્યાંથી આવી તે પણ મોટો પ્રશ્ન છે.