Russia-Ukraine War: યુદ્ધ સ્તર પર ચાલી રહ્યું છે ઓપરેશન ગંગા મિશન, વધુ 183 ભારતીયોની થઈ વાપસી

નવી દિલ્હીઃ યુક્રેન-રશિયામાં આજે 11માં દિવસે યુદ્ધ ચાલી રહ્યું છે. આ વચ્ચે ભારત સરકાર દ્વારા ત્યાં ફસાયેલા ભારતીયોને પરત લાવવા માટે ઓપરેશન ગંગા અભિયાન ચલાવવામાં આવી રહ્યું છે. આ હેઠળ આજે સવારે યુક્રેનમાં ફસાયેલા વધુ 183 ભારતીય નાગરિકોને લઈને એક વિશેષ ફ્લાઇટ દિલ્હી પહોંચી છે. કેન્દ્રીય પર્યાવરણ મંત્રી ભૂપેન્દ્ર યાદવે ઈન્દિરા ગાંધી આંતરરાષ્ટ્રીય એરપોર્ટ પર આ યાત્રીકોનું સ્વાગત કર્યું હતું. મહત્વનું છે કે ઓપરેશન ગંગા મિશન હેઠળ શનિવારે વિશેષ વિમાન હંગરીની રાજધાની બુડાપેસ્ટથી રવાના થયું હતું. 

એક વિદ્યાર્થી બે બિલાડીને સાથે લાવ્યો
યુક્રેનથી ભારત પરત આવેલો એક વિદ્યાર્થી બે બિલાડીને સાથે લાવ્યો છે. વિદ્યાર્થીનું કહેવું છે કે આ બંને તેની ખાસ મિત્ર છે. એએનઆઈ સાથે વાતચીતમાં તેણે કહ્યુ કે, આ બિલાડીઓ મારી જિંદગી છે, હું તેને યુક્રેન છોડીને આવી શક્યો નહીં. વિદ્યાર્થીએ કહ્યું કે, ભારતીય દૂતાવાસે તેના પાલતૂ પશુને લાવવામાં ખુબ મદદ કરી છે. 

અત્યાર સુધી 13 હજારથી વધુ ભારતીયોની થઈ વાપસી
વિદેશ મંત્રાલયે શનિવારે કહ્યું કે, ઓપરેશન ગંગા હેઠળ 63 ઉડાનોથી અત્યાર સુધી લગભગ 13300 લોકો યુક્રેનથી ભારત પરત ફર્યા છે. તેમણે કહ્યું કે, છેલ્લા 24 કલાકમાં લગભગ 2900ને લઈને 15 ઉડાનો ઉતરી છે. એક બ્રીફિંગમાં વિદેશ મંત્રાલયના પ્રવક્તાએ કહ્યુ- છેલ્લા 24 કલાકમાં લગભગ 2900 લોકોની સાથે 15 ઉડાનો ઉતરી છે. ઓપરેશન ગંગા હેઠળ 63 ઉડાનોથી અત્યાર સુધી 13300 લોકો ભારત પરત ફર્યા છે.