Corona Update: છેલ્લા 24 કલાકમાં કોરોનાના કેસમાં જબરદસ્ત ઉછાળો, મહારાષ્ટ્રના નાના શહેરોમાં પણ વધવા લાગ્યા કેસ

નવી દિલ્હી: દેશમાં એક બાજુ જ્યાં મોટા પાયે કોરોના રસીકરણ અભિયાન ચાલુ છે ત્યાં સતત વધી રહેલા કોરોના (Corona Virus)  કેસે ચિંતામાં વધારો કર્યો છે. છેલ્લા 24 કલાકમાં કોરોનાના 40 હજાર જેટલા નવા દર્દીઓ નોંધાતા સરકારના હોશ ઉડ્યા છે. દેશમાં કોરોનાથી સૌથી વધુ પ્રભાવિત રાજ્યોમાં મહારાષ્ટ્ર પહેલા નંબરે છે. આવામાં ચિંતા થવા લાગી છે કે જો ક્યાંક ગામડાઓમાં કોરોનાનો મોટા પાયે પગપેસારો થયો તો કાબૂ કેવી રીતે મેળવવામાં આવશે. 

કોરોનાના નવા 39 હજારથી વધુ કેસ
કેન્દ્રીય આરોગ્ય મંત્રાલયના જણાવ્યાં મુજબ ભારતમાં છેલ્લા 24 કલાકમાં કોરોના વાયરસ (Corona Virus) ના નવા  39,726 દર્દીઓ નોંધાયા છે. આ સાથે જ કુલ કેસની સંખ્યા 1,15,14,331 પર પહોંચી છે. જેમાંથી 1,10,83,679 દર્દીઓ કોરોનાને હરાવવામાં સફળ રહ્યા છે જ્યારે 2,71,282 લોકો હજુ પણ સારવાર હેઠળ છે. એક જ દિવસમાં કોરોનાથી 154 દર્દીના મોત નિપજ્યા છે. કોરોનાથી કુલ મૃત્યુનો આંકડો 1,59,370 થયો છે. રસીકરણ અભિયાન હેઠળ અત્યાર સુધીમાં 3,93,39,817 લોકોને રસી આપવામાં આવી છે.