દિલ્હી જળ બોર્ડની ઓફિસમાં તોડફોડ, AAPએ ભાજપ પર લગાવ્યો હુમલાનો આરોપ

નવી દિલ્હીઃ દિલ્હી જળ બોર્ડની ઓફિસમાં ગુરૂવારે અચાનક હિંસક ભીડે અંદર ઘુસીને તોડફોડ કરી છે. ઘટનાનો વીડિયો હવે ઈન્ટરનેટ પર વાયરલ થઈ ગયો છે. વીડિયોમાં ઝંડેવાલાનમાં સ્થિત ડીજેબીના કાર્યાલયમાં 100થી વધુ લોકોના ટોળાને તોડફોડ કરતા જોઈ શકાય છે, જ્યારે એક પોલીસકર્મી તેને પકડવાનો પ્રયાસ કરે છે. ટોળુ આખરે કાચના દરવાજાને તોડીને અંગર ઘુસી જાય છે. 

આમ આદમી પાર્ટીએ આ તોડફોડ માટે ભાજપ પર આરોપ લગાવ્યો છે. આપ નેતા રાધવ ચડ્ઢાએ કહ્યુ કે, ભાજપના ગુંડાએ દિલ્હી જળ બોર્ડના કાર્યાલયમાં ઘુસી બર્બરતા કરી છે. તેમમે મને પડકાર આપ્યો અને કિસાનોનું સમર્થન કરવા તથા તેના માટે બોલવા વિરુદ્ધ સીએમ અરવિંદ કેજરીવાલને ચેતવણી આપી છે. સીસીટીવી ફુટેજ છે. તે સ્પષ્ટ છે કે આ ઘટના દિલ્હી પોલીસની મદદથી થઈ છે. 

રાજ્યના નાયબ મુખ્યમંત્રી મનીષ સિસોદિયાએ પણ આ ઘટનાને ભાજપ પ્રાયોજિત ગણાવવાનો પ્રયાસ કર્યો છે. ઘટનાનો એક વીડિયો રી-ટ્વીટ કરતા તેમણે કહ્યું, ભાજપના મોટા-મોટા નેતાઓની આગેવાનીમાં રાઘવ ચડ્ઢા પર હુમલો. જુઓ કિસાન આંદોલનનું સમર્થન આપવા પર બદલો લેવા પહોંચ્યા ભાજપના નેતાઓ.