લેહને ચીનમાં બતાવતું હતું ટ્વિટર, ભારત સરકારે સીઈઓ Jack dorseyને આપી કડક ચેતવણી

નવી દિલ્હી: ભારત સરકારે ટ્વિટર (Twitter) ના સીઈઓ જેક ડોર્સીને ખુબ ફટકાર લગાવી છે. કંપનીના પ્લેટફોર્મ પર ભારત અંગે ખોટી જાણકારી અપાઈ હતી. ડોર્સીને લખાયેલા પત્રમાં ઈન્ફોર્મેશન ટેક્નોલોજી સચિવ અજય સાહનીએ ઝાટકણી કાઢતા કહ્યું કે આવી કોઈ કોશિશ સહન કરાશે નહીં. સાહનીએ લખ્યું કે ટ્વિટર દેશના સાર્વભૌમત્વ અને અખંડિતતાનું અપમાન કરનારી કોઈ હરકત ન કરે. જાણીતી માઈક્રોબ્લોગિંગ સાઈટ ટ્વિટર પર લેહને ચીનનો હિસ્સો ગણાવવામાં આવી રહ્યો હતો. ભારતીય યૂઝર્સના આકરા વિરોધ બાદ ટ્વિટરે જિયોટેગમાં આ ભૂલ દૂર કરી દીધી હતી. 

આઈટી સચિવ અજય સાહનીએ ટ્વિટરને સ્પષ્ટ શબ્દોમાં કહી દીધુ કે લેહ કેન્દ્ર શાસિત પ્રદેશ લદાખનો હિસ્સો છે અને લદાખ જમ્મુ અને કાશ્મીર ભારતના અભિન્ન ભાગ છે. જે ભારતના બંધારણ દ્વારા શાસિત છે. તેમણે કહ્યું કે ટ્વિટરે ભારતના લોકોની ભાવનાનું સન્માન કરવું જોઈએ. ટ્વિટર દ્વારા ભારતના સાર્વભૌમત્વ અને અખંડિતતા- જે નક્શા દ્વારા પણ પરિલક્ષિત થાય છે, તેની સાથે કરાયેલું અપમાન સહન કરાશે નહીં અને તે કાયદાનો ભંગ ગણાશે. ટ્વિટરને આકરી ચેતવણી આપતા આઈટી સચિવે લખ્યું કે આવા કાર્યોથી ટ્વિટરની પ્રતિષ્ઠા ખરડાય છે અને તટસ્થતા તથા નિષ્પક્ષતા ઉપર સવાલ ઊભા થાય છે. 

અત્રે જણાવવાનું કે ગત રવિવારે ટ્વિટરની આ હરકતની જાણ થઈ હતી. વાત જાણે એમ છે કે નેશનલ સિક્યુરિટી એનાલિસ્ટ નીતિન ગોખલેએ રવિવારે લેહના જાણીતા વોર મેમોરિયલથી ટ્વિટર લાઈવ કર્યું તો ચોંકી ગયા. તેમને લોકેશન જમ્મુ અને કાશ્મીર, પીપલ્સ રિપબ્લિક ઓફ ચાઈના બતાવતું હતું. ત્યારબાદ અનેક યૂઝર્સે પણ લેહથી લાઈવ કરવાની કોશિશ કરી પણ ટ્વિટર તેને ચીનનો ભાગ જ ગણાવતું રહ્યું. લોકો ટ્વિટરની આ હરકત વિરુદ્ધ કડક કાર્યવાહીની માગણી કરતા હતા.