મુંબઈ: મોલમાં લાગેલી આગ બેકાબૂ, નજીકની ઈમારતમાંથી 3500 લોકોને રેસ્ક્યૂ કરાયા

મુંબઈ: નાગપાડાના સ્ટી સેન્ટર મોલમાં લાગેલી આગ 12 કલાક બાદ પણ કાબૂમાં આવી નથી. આગ ઓલવવા માટે ફાયર વિભાગના  લગભગ 250 અધિકારીઓ અને જવાનો કામે લાગ્યા છે. હાલાત બેકાબૂ જોતા મુંબઈ ફાયર બ્રિગેડે તેને બ્રિગેડ કોલ ડિક્લેર કરી લીધી છે. 

હાઉસિંગ સોસાયટીમાંથી 35 લોકોને બહાર કાઢવામાં આવ્યા
મળતી માહતી મુજબ મોલમાં આગની સાથે કાળો ધૂમાડો પણ નીકળી રહ્યો છે. જેના કારણે આસપાસની હાઉસિંગ સોસાયટીઓમાં રહેતા લોકોને શ્વાસની મુશ્કેલી થઈ રહી છે. હાલાત પર કાબૂ મેળવવા માટે પોલીસ અને પ્રશાસને મોલ નજીક આવેલી 55 માળની ઓર્કિડ એન્કલેવ ઈમારતને ખાલી કરાવી દીધી છે. આ બિલ્ડિંગમાં રહેતા લગભગ 3500 લોકોને ઘરમાંથી બહાર કાઢીને સુરક્ષિત સ્થળો પર લઈ જવાયા છે. 

પેટ્રોલિંગ કંપનીઓ પાસે મદદ મંગાઈ
મોલમાં લાગેલી આગ બૂઝાવવા માટે આસપાસના ફાયર સ્ટેશનની ડઝનો જેટલી ગાડીઓ કામે લાગી છે. ત્યારબાદ પણ આગ ન બૂઝાતા ફાયર ડિપાર્ટમેન્ટે હવે તેને બ્રિગેડ કોલ ડિક્લેર કરી છે. તેનો અર્થ એ છે કે આગ એટલી ભયંકર છે કે ફાયર વિભાગના કાબૂ બહાર છે અને વિભાગે આગને પહોંચી વળવા માટે એક્સપર્ટ પેટ્રોલિયમ કંપનીઓ HPCL, BPCL, BPT પાસે મદદ માંગવામાં આવી છે. મોલમાં લાગેલી આ આગને બૂઝાવવા દરમિયાન બે ફાયરકર્મી પણ ઘાયલ થયા જેમને જેજે હોસ્પિટલ મોકલવામાં આવ્યા છે.