જીંદ પેટા ચૂંટણીઃ આ એવી સીટ હતી જ્યાં BJP ક્યારેય જીતી શક્યું નથીઃ પીએમ મોદી

નવી દિલ્હીઃ વડા પ્રધાન નરેન્દ્ર મોદીએ ભાજપના ઉમેદવારને પોતાનો બહુમૂલ્ય મત આપવા માટે હરિયાણાના જીંદ વિધાનસભા વિસ્તારની પ્રજાનો ગુરૂવારે આભાર માન્યોહતો અને જણાવ્યું કે, એ જોઈને આનંદ થયો છે કે પક્ષના વિકાસના એજન્ડાને સમાજના તમામ વર્ગોનું સમર્થન મળી રહ્યું છે. તેમણે પક્ષના હરિયાણા એકમ અને ત્યાંના મુખ્યમંત્રી મનોહરલાલ ખટ્ટરને પણ અભિનંદન પાઠવ્યા હતા.

પીએમ મોદીએ ટ્વીટ કરીને જણાવ્યું કે, 'હરિયાણા ભાજપાને પોતાનો આશિર્વાદ આપવા માટે હું જીંદની પ્રજાને અભિનંદન પાઠવું છું. આ એક એવી બેઠક હતી જ્યાં ભાજપ ક્યારેય જીતી શક્યું નથી. સમાજના તમામ વર્ગો વચ્ચે ભાજપના વિકાસના એજન્ડાને જે સમર્થન મળી રહ્યું છે એ જોઈને મને આનંદ થયો છે.'

ભાજપના ઉમેદવાર કૃષ્ણ મિડ્ઢાએ પોતાના હરીફ ઉમેદવાર જેજેપીના દિગ્વિજય સિંહ ચૌટાલાને 12,935 વોટના અંતરથી હરાવીને આ સીટ જીતી હતી. કોંગ્રેસના ઉમેદવાર રણદીપ સુરજેવાલા ત્રીજા સ્થાને રહ્યા. સુરજેવાલા અત્યારે કૈથલ વિધાનસભા બેઠક પરથી પક્ષના ધારાસભ્ય છે. મીડ્ઢા એમબીબીએસ ડોક્ટર છે અને તેમના પિતાના નિધન બાદ આ બેઠક ખાલી થઈ હતી.