ફાનીએ ઓડિશામાં વેર્યો વિનાશ, અત્યાર સુધી 10ના મોત, PM મોદીએ કહ્યું-`પીડિતોની પડખે આખો દેશ`

નવી દિલ્હી: બંગાળની ખાડીમાં સર્જાયેલા ફાની ચક્રવાતે શુક્રવારે ઓડિશામાં કેર વર્તાવ્યા બાદ મોડી રાતે તે પશ્ચિમ બંગાળ પહોંચ્યું. ફાની તોફાન ખડગપુરમાંથી પસાર થયું ત્યારે અહીં ખુબ ઝડપથી પવન ફૂંકાયો અને ઠેર ઠેર વરસાદના કારણે પાણી ભરાઈ ગયાં. અનેક જગ્યાએ ઝાડ ઉખડી ગયા છે. કોલકાતામાં ભારે વરસાદ પણ પડ્યો. હવે આ વાવાઝોડું ઉત્તર-પૂર્વ દિશા તરફ 90 કિમી પ્રતિ કલાકની ઝડપે વધીને પં.બંગાળ પહોંચ્યું.

ભારે વરસાદ અને 175 કિમી પ્રતિ કલાકની ઝડપથી ફૂંકાતા પવન સાથે ચક્રવાત ફાની શુક્રવાર સવારે ઓડિશાના દરિયાકાંઠે ત્રાટક્યું હતું. ફાનીના કારણે ઓડિશામાં આઠ લોકોના મોત થયા છે. દરિયાકાંઠાના રાજ્યોમાં એલર્ટ જાહેર છે. માછીમારોને દરિયો ન ખેડવાની સલાહ આપવામાં આવી છે. 

ઓડિશામાં તોફાનના કારણે અનેક ઝાડ ઉખડી ગયા અને ઝૂંપડીઓ નષ્ટ થઈ ગઈ. આ સાથે જ અનેક ગામડાં અને શહેર જળબંબાકાર બની ગયાં. ચક્રવાતી તોફાન ફાનીએ સવારે 8 વાગે રાજ્યની ધાર્મિક નગરી પુરીમાં દસ્તક આપી હતી. બાંગ્લામાં આ તોફાનનું ઉચ્ચારણ ફોની તરીકે પણ થાય ચે. જેનો અર્થ સાપની ફેણ થાય છે. ભારે વરસાદના કારણે પ્રભાવિત વિસ્તારોમાં સ્થિત ઘરો ડૂબી ગયાં. 

વરિષ્ઠ અધિકારીઓના જણાવ્યાં મુજબ અત્યાર સુધી ઓછામાં ઓછા 8 લોકોના મોત થયા છે. અનેક વિસ્તારોમાંથી સૂચનાની રાહ જોવાઈ રહી છે. ઓડિશાના મુખ્યમંત્રી નવીન પટનાયકે સ્થિતિની સમીક્ષા કરી છે. તેમણે કહ્યું કે પુરી જિલ્લાને ભારે નુકસાન પહોંચ્યું છે. જ્યાં ચક્રવાત સૌથી પહેલા ત્રાટક્યું.