બલિયા ગોળીકાંડ: યક્ષ પ્રશ્ન!, પોલીસની પકડમાંથી આરોપી કેવી રીતે ભાગી ગયો?

લખનઉ: ઉત્તર પ્રદેશ (Uttar Pradesh) ના બલિયા (Ballia) માં સરકારી કોટા હેઠળ લોકોને દુકાન ફાળવણી કરવા માટે બોલાવવામાં આવેલી બેઠક દરમિયાન પોલીસની હાજરીમાં જ થયેલા ફાયરિંગમાં એક વ્યક્તિનું મૃત્યુ થયું. આ મામલે પોલીસે 8 લોકો સામે કેસ દાખલ કર્યો છે અને આરોપીઓની ધરપકડ કરવા માટે પ્રયત્નો ચાલુ છે. મૃતકના પરિજનોએ પોલીસ પર આરોપીને ભગાડવાનો આરોપ લગાવ્યો છે. 

કેવી રીતે ફરાર થઈ ગયો આરોપી ધીરેન્દ્ર સિંહ
ફાયરિંગ મામલે 8 લોકોના નામ સામેલ છે જ્યારે 25 અજાણ્યા લોકો સામે ગુનો નોંધાયો છે. પરંતુ હજુ સુધી કોઈની ધરપકડ થઈ નથી. ઘટના સ્થળે હાજર રહેલા પોલીસકર્મીઓ પર આરોપીને પકડ્યા બાદ ભગાડી મૂકવાનો આરોપ લાગ્યો છે. જેના પર ઉત્તર પ્રદેશના Deputy Commissioner of Police સુભાષચંદ દુબેએ કહ્યું કે આરોપી ધીરેન્દ્ર સિંહને પકડી લેવાયો હતો, તે કેવી રીતે ભાગી ગયો તે મુદ્દે પણ કાર્યવાહી કરવામાં આવશે. 

યુપી સીએમની કડક કાર્યવાહી
ઘટનાને ગંભીરતાથી લેતા ઉત્તર પ્રદેશના મુખ્યમંત્રી યોગી આદિત્યનાથે એસડીએમ, સીઓ, અને ઘટનાસ્થળ પર હાજર અનેક પોલીસકર્મીઓને સસ્પેન્ડ કરવાના નિર્દેશ આપ્યા છે. આ મામલે વિપક્ષે પણ રાજ્યમાં સુરક્ષા વ્યવસ્થા પર સવાલ ઉઠાવ્યા છે.