Corona Update: શું રજિસ્ટ્રેશન કરાવ્યા વગર કોરોના રસી મૂકાવી શકાશે? ખાસ જાણો જવાબ

નવી દિલ્હી: દેશમાં કોરોનાનો પ્રકોપ ધીરે ધીરે ઘટી રહ્યો હોય તેવું જણાય છે. આરોગ્ય મંત્રાલયે બહાર પાડેલા આંકડા મુજબ છેલ્લા 24 કલાકમાં કોરોના વાયરસના નવા 23,068 દર્દીઓ નોંધાયા છે. જ્યારે તેની સામે 24,661 દર્દીઓ સાજા પણ થઈ ગયા છે. દેશમાં કોરોના વાયરસના કુલ કેસનો આંકડો 1,01,46,846 પર પહોંચી ગયો છે.આ બાજુ સરકારે મોટા પાયે કોરોના રસીકરણની તૈયારીઓ પણ શરૂ કરી દીધી છે. દેશમાં આગામી થોડા દિવસોમાં કોરોના રસીકરણ શરૂ થઈ જશે. પરંતુ શું આ લાભ બધાને મળશે? આખરે તે માટે શું સિસ્ટમ હશે? જાણો આ સવાલોના જવાબ....

રસીકરણ માટે લોકોએ રજિસ્ટ્રેશન કરાવવું જ પડશે
કેન્દ્રીય આરોગ્ય મંત્રાલયના જણાવ્યાં મુજબ કોરોના રસી તમામ લોકો મૂકાવી શકશે. પરંતુ આ માટે તેમણે રજિસ્ટ્રેશન પ્રક્રિયા કરવી પડશે. આ રજિસ્ટ્રેશન આરોગ્ય વિભાગના કેન્દ્રોમાં કરવામાં આવશે. રજિસ્ટ્રેશન થયા બાદ જ તેમને સ્થાન અને સમયની જાણકારી આપવામાં આવશે. 

રજિસ્ટ્રેશન માટે ઓળખનો કોઈ એક પુરાવો આપવો પડશે
આરોગ્ય મંત્રાલયના જણાવ્યાં મુજબ રસી માટે રજિસ્ટ્રેશન કરાવવા લોકોએ પાન કાર્ડ, પાસપોર્ટ, પેન્શન કાર્ડ, મનરેગા જોબ કાર્ડ, ડ્રાઈવિંગ લાઈસન્સ કે વોટર આઈડીમાંથી કોઈ એક લઈને જવું પડશે. આમાંથી કોઈ પણ પુરાવો નહીં હોય તો લોકોનું રજિસ્ટ્રેશન થશે નહીં.