દેશમાં વધી રહેલી ગરમીથી પીએમ મોદી ચિંતિત, ચોમાસાની તૈયારીને લઈને પણ યોજી બેઠક

નવી દિલ્હીઃ ત્રણ દેશોના વિદેશ પ્રવાસથી પરત ફર્યા બાદ પ્રધાનમંત્રી નરેન્દ્ર મોદીએ ગુરૂવારે દેશના વિવિધ ભાગમાં પડી રહેલી ભીષણ ગરમી અને ચોમાસાની તૈયારીઓની સમીક્ષા કરવા માટે એક મહત્વની બેઠક યોજી હતી. મહત્વનું છે કે દેશના અનેક ભાગમાં ભારે ગરમી પડી રહી છે. સરકારી સૂત્રએ કહ્યું કે, યુરોપીયન દેશના પ્રવાસથી પરત ફર્યા બાદ પીએમ મોદી સાતથી આઠ બેઠક યોજવાના છે. 

દેશના ઘણા ભાગમાં ગરમીનો પારો ઝડપથી વધી રહ્યો છે અને અનેક શહેરોમાં તાપમાન 45 ડિગ્રીથી ઉપર પહોંચી ગયું છે. તો રાજધાની દિલ્હી સહિત દેશના કેટલાક ભાગમાં બુધવારે વરસાદ સાથે કરા પડ્યા હતા. જેથી લોકોને થોડી રાહત મળી છે.

મહત્વનું છે કે દિલ્હીમાં આજે સાંજે તાપમાન 37 ડિગ્રી હતી, પરંતુ ભારે પવન વરસાદ અને કરા પડવાને કારણે સાંજે છ કલાકે ઘટીને 31 ડિગ્રી થઈ ગયું હતું. હવામાન વિભાગ પ્રમાણે હરિયાભા, પંજાબ, ઉત્તર રાજસ્થાન તથા પશ્ચિમ તથા મધ્ય ઉત્તર પ્રદેશના કેટલાક ભાગમાં હળવો વરસાદ, કરા પડવાની સાથે ભારે પવન ફૂંકાયો હતો.