કોંગ્રેસનો આરોપ-ફેસબુક પર BJPનો કંટ્રોલ, રવિશંકર પ્રસાદનો વળતો જવાબ ` ડેટાને હથિયાર બનાવતા રંગે હાથ...`

નવી દિલ્હી: વોલ સ્ટ્રીટ જર્નલના એક રિપોર્ટમાં ફેસબુક દ્વારા ભારતમાં સત્તાધારી પક્ષના નેતાઓ પર હેટ સ્પિચ સંબંધી નિયમોને લાગુ કરવામાં બેદરકારીના દાવા થયા બાદ રવિવારે કોંગ્રેસ અને ભાજપ વચ્ચે આરોપ-પ્રત્યારોપ શરૂ થઈ ગયાં. કોંગ્રેસના નેતા રાહુલ ગાંધીએ રિપોર્ટને લઈને ભાજપ તથા રાષ્ટ્રીય સ્વયંસેવક સંઘ પર ફેસબુક તથા વોટ્સએપનો ઉપયોગ કરીને મતદારોને પ્રભાવિત કરવા માટે ફેક ન્યૂઝ ફેલાવવાનો આરોપ લગાવ્યો. જેના પર પલટવાર કરતા ભાજપના દિગ્ગજ નેતા રવિશંકર પ્રસાદે કહ્યું કે તેઓ કહે છે કે સમગ્ર દુનિયા ભાજપ, આરએસએસથી નિયંત્રિત છે. ચૂંટણી પહેલા ડેટાને હથિયાર બનાવતા રંગે હાથે પકડાયા હતાં. કેમ્બ્રિજ એનાલિટિકા, ફેસબુક સાથેની સાંઠગાંઠ પકડાઈ હતી. ત્યારે આવા લોકો આજે બેશરમીથી સવાલ ઊભા કરી રહ્યાં છે. 

રાહુલ ગાંધીએ રિપોર્ટની એક તસવીર  શેર કરીને ટ્વિટ કરી જેમાં ભાજપ અને આરએસએસ પર નિશાન સાધતા કહ્યું કે "ભાજપ અને આરએસએસ ભારતમાં ફેસબુક અને વોટ્સએપને નિયંત્રણ કરે છે. તેઓ આ માધ્યમથી ફેક ન્યૂઝ અને નફરત ફેલાવે છે અને મતદારોને લલચાવવા માટે તેનો ઉપયોગ કરે છે. આખરે અમેરિકી મીડિયાએ ફેસબુક અંગે સત્ય સામે લાવી દીધુ છે."

પ્રિયંકા ગાંધીએ પણ આ મામલે એક પોસ્ટ શેર કરીને કહ્યું કે ભાજપના નેતા ખોટી જાણકારી અને નફરત ફેલાવવા માટે ફેસબુકનો ઉપયોગ કરી રહ્યાં છે. કોંગ્રેસના નેતાએ આરોપ લગાવ્યો કે ભાજપે ફેસબુકના અધિકારીઓ સાથે સાંઠગાંઠ કરી જેથી કરીને સોશિયલ મીડિયા પર નિયંત્રણ રહે.