વિશ્વ ક્રિકેટમાં 1000 મેચ જીતનાર પ્રથમ દેશ બન્યો ઓસ્ટ્રેલિયા
ઓસ્ટ્રેલિયાએ શનિવારે સિડનીમાં રમાયેલી વનડે મેચમાં ભરતને 34 રનથી પરાજય આપ્યો હતો. આ સાથે તેણે ત્રણ મેચોની સિરીઝમાં 1-0ની લીડ મેળવી લીધી છે.
નવી દિલ્હીઃ ઓસ્ટ્રેલિયાએ 2019માં જીતની શરૂઆત કરતા અનોખો રેકોર્ડ પોતાના નામે કરી લીધો છે. તેણે શનિવારે સિડનીમાં રમાયેલી વનડે મેચમાં ભારતને 34 રને હરાવ્યું હતું. આ સાથે ઓસ્ટ્રેલિયા 1000 આંતરરાષ્ટ્રીય મેચ જીતનાર વિશ્વનો પ્રથમ દેશ બની ગયો છે. ઓસ્ટ્રેલિયા એકમાત્ર ટીમ છે, જેણે 800થી વધુ આંતરરાષ્ટ્રીય મેચ જીતી છે. ઈંગ્લેન્ડની ટીમ 774 જીતની સાથે બીજા સ્થાને છે.
559મી વખત જીતી વનડે મેચ
ઓસ્ટ્રેલિયાની ટીમ ટેસ્ટ અને વનડે ફોર્મેટમાં સૌથી વધુ મેચ જીતનારી ટીમ છે. તેણે અત્યાર સુધી 1853 આંતરરાષ્ટ્રીય મેચ રમી છે. તેમાં 818 ટેસ્ટ, 921 વનડે અને 114 ટી20 મેચ સામેલ છે. ઓસ્ટ્રેલિયાએ તેમાંથી 384 ટેસ્ટ, 559 વનડે અને 58 ટી20 મેચ જીતી છે. ટેસ્ટ અને વનડેમાં જીતના મામલામાં તે વિશ્વની નંબર વન ટીમ છે. પાકિસ્તાને સૌથી વધુ 89 ટી20 મેચ જીતી છે. સૌથી વધુ ટી20 મેચ જીતવાના મામલામાં ભારત (69) ત્રીજા અને દક્ષિણ આફ્રિકા (63) ચોથા સ્થાને છે.
ભારતને 122મી વખત હરાવ્યું
ઓસ્ટ્રેલિયા અને ભારત વચ્ચે ત્રણેય ફોર્મેટમાં કુલ મળીને 244 મેચ યોજાઈ છે. તેમાંથી 122 મેચ ઓસ્ટ્રેલિયાએ જીતી છે, જ્યારે ભારતે 84 મેચ કબજે કરી છે. બંન્ને દેશો વચ્ચે એક મેચ ટાઈ રહી, 26 ટેસ્ટ ડ્રો રહ્યાં અને 11 મેચ રદ્દ થઈ છે. ત્રણેય ફોર્મેટમાં મળીને વાત કરીએ તો ઓસ્ટ્રેલિયાએ સૌથી વધુ 234 વખત ઈંગ્લેન્ડને હરાવ્યું છે. આ સિવાય વેસ્ટ ઈન્ડિઝને 136, ન્યૂઝીલેન્ડને 128, આફ્રિકા 111 અને પાકિસ્તાન 100 વખત હાર્યું છે. શ્રીલંકાની ટીમ ઓસ્ટ્રેલિયા સામે 82 વખત હારી છે.
સૌથી વધુ આંતરરાષ્ટ્રીય મેચ જીતનાર 10 દેશ
ટીમ મેચ જીત હાર ટાઈ ડ્રો રદ્દ
ઓસ્ટ્રેલિયા 1851 1000 593 13 209 36
ઈંગ્લેન્ડ 1833 774 676 9 345 29
ભારત 1595 711 614 11 216 43
પાકિસ્તાન 1462 702 571 11 159 19
વેસ્ટઈન્ડિઝ 1434 608 606 14 175 31
દ.આફ્રિકા 1135 595 393 6 124 17
શ્રીલંકા 1219 522 567 6 86 38
ન્યૂઝીલેન્ડ 1294 486 589 11 165 43
ઝિમ્બાબ્વે 686 159 481 8 27 11
બાંગ્લાદેશ 552 157 370 0 16 9
28 ટીમો રમી ચુકી છે આંતરરાષ્ટ્રીય મેચ
વિશ્વ ક્રિકેટની વાત કરીએ તો અત્યાર સુધી માત્ર 25 દેશો જ આઈસીસીના ટેસ્ટ, વનડે કે ટી20 ક્રિકેટના કોઈપણ ફોર્મેટમાં રમવાનો દરજ્જો મેળવી ચુક્યા છે. તેમાંથી 12 દેશોને ટેસ્ટ ક્રિકેટ રમવાનો દરજ્જો મળેલો છે. બાકી 13 દેશોને અલગ અલગ સમયે વનડે રમવાનો દરજ્જો મળતો રહ્યો છે, જે ખરાબ પ્રદર્શન બાદ પરત લઈ શકાય છે. આ 25 દેશો સિવાય આઈસીસી ઈલેવન, એશિયા ઈલેવન અને આફ્રિકા ઈલેવન પણ આંતરરાષ્ટ્રીય મેચ રમી ચુકી છે.