જબરદસ્ત મેચ! હારવા છતાં આ 2 ખેલાડીઓએ શ્રીલંકાને રડાવ્યું, વન ડેમાં 720 રન બન્યા

Pathum Nissanka double century: પથુમ નિસાન્કાની રેકોર્ડ બેવડી સદીના આધારે શ્રીલંકાની ક્રિકેટ ટીમે પ્રથમ વનડેમાં અફઘાનિસ્તાનને હરાવ્યું હતું. યજમાન ટીમે આ મેચ જીતી હોવા છતાં અફઘાનિસ્તાનના બે બેટ્સમેનોએ પોતાની બેટિંગથી બધાના દિલ જીતી લીધા હતા. હાઈ સ્કોરિંગ મેચમાં અફઘાનિસ્તાનની અડધી ટીમ 55 રનના કુલ સ્કોર સાથે પેવેલિયન પરત ફરી ગઈ હતી, પરંતુ આ પછી અઝમતુલ્લા ઓમરઝાઈ અને મોહમ્મદ નબીએ તોફાની ઈનિંગ્સ રમીને મેચમાં રોમાંચ પેદા કર્યો હતો. બંનેએ રેકોર્ડ ભાગીદારી કરીને વર્લ્ડ રેકોર્ડ બનાવ્યો હતો. ઉમરઝાઈ અને નબીના નામ હવે ઈતિહાસના પાનાઓમાં નોંધાઈ ચૂક્યા છે.

અઝમતુલ્લા ઓમરઝાઈ અને મોહમ્મદ નબીએ શ્રીલંકા-અફઘાનિસ્તાન ODI મેચ (SL vs AFG)માં છઠ્ઠી વિકેટ માટે રેકોર્ડ 242 રનની ભાગીદારી કરી હતી. વન-ડે ઈન્ટરનેશનલ ક્રિકેટના ઈતિહાસમાં કોઈપણ હારેલી ટીમ દ્વારા કોઈપણ વિકેટ માટે આ સૌથી વધુ ભાગીદારી છે. ઉમરઝાઈ અને નબીની જોડીએ 24 વર્ષ જૂનો રેકોર્ડ તોડ્યો જે દક્ષિણ આફ્રિકાની જોડી ગેરી કર્સ્ટન અને હર્શલ ગિબ્સ દ્વારા બનાવવામાં આવ્યો હતો. કર્સ્ટન અને ગિબ્સની જોડીએ વર્ષ 2000માં કોચીમાં 235 રનની ભાગીદારી કરી હતી.

5 વિકેટ ગુમાવ્યા બાદ સર્વોચ્ચ સ્કોર
આ સિવાય ODI ક્રિકેટમાં 5 વિકેટ ગુમાવ્યા બાદ ટીમ દ્વારા સૌથી વધુ રન બનાવવાનો રેકોર્ડ પણ બનાવ્યો છે. પ્રથમ 5 વિકેટ ગુમાવવા છતાં અફઘાનિસ્તાને 284 રન ઉમેર્યા જે એક વિશ્વ રેકોર્ડ છે. આ પહેલા આ રેકોર્ડ ન્યૂઝીલેન્ડના નામે હતો જેણે વર્ષ 2015માં શ્રીલંકા સામે 267 રન બનાવ્યા હતા.

બંનેએ સદી ફટકારી..
પ્રથમ બેટિંગ કરતા શ્રીલંકાએ ઓપનર પથુમ નિસાન્કાના અણનમ 210 રન અને અવિષ્કા ફર્નાન્ડોના 88 રનની મદદથી 50 ઓવરમાં 3 વિકેટે 381 રન બનાવ્યા હતા. જવાબમાં અફઘાનિસ્તાનની ટીમની શરૂઆત સારી રહી ન હતી અને 19ના સ્કોર પર 3 વિકેટ ગુમાવી દીધી હતી. એક સમયે અફઘાનિસ્તાનનો સ્કોર 5 વિકેટે 55 રન હતો. જે બાદ અઝમતુલ્લા ઉમરઝાઈ અને મોહમ્મદ નબીએ દાવ સંભાળી લીધો અને મેચમાં રોમાંચ સર્જી દીધો. ઉમરઝાઈએ ​​115 બોલમાં અણનમ 149 રન બનાવ્યા જ્યારે નબીએ 130 બોલમાં 136 રન બનાવ્યા. અફઘાનિસ્તાનની ટીમ 6 વિકેટે 339 રન બનાવવામાં સફળ રહી હતી. જો કે તે મેચ 42 રનથી હારી ગયા હતા.