Taiwan એ તોડી પાડ્યું ચીનનું સુખોઈ-35 ફાઈટર જેટ? VIDEO થયો વાયરલ

તાઈપે: ચીન (China)  સાથે તણાવ વચ્ચે તાઈવાન (Taiwan)ના એક ચીની ફાઈટર જેટ (Fighter Jet) ને તોડી પાડ્યું હોવાના રિપોર્ટ્સમાં દાવો થઈ રહ્યો છે. જો કે ચીન અને તાઈવાનમાંથી કોઈ પણ હજુ આ અહેવાલને સત્તાવાર સમર્થન આપ્યું નથી. મીડિયા રિપોર્ટ્સમાં દાવો કરાઈ રહ્યો છે કે તાઈવાને પોતાના એર સ્પેસમાં ઘૂસી આવેલા ચીનના સુખોઈ-35 (Sukhoi-35)  વિમાનને તોડી પાડ્યું છે. કહેવાય છે કે આ હુમલામાં તાઈવાને અમેરિકી પેટ્રિયોટ મિસાાઈલ ડિફેન્સ સિસ્ટમનો ઉપયોગ કર્યો છે. 

રિપોર્ટ્સમાં એવો દાવો થઈ રહ્યો છે કે તાઈવાને ચીની વિમાનને અનેકવાર ચેતવણી આપી પરંતુ આમ છતાં વિમાન તાઈવાનના એરસ્પેસમાં જ રહ્યું. ત્યારબાદ તાઈવાને તેને તોડી પાડ્યું. કહેવાય છે કે આ ઘટનામાં પાયલટ ઘાયલ થયો છે. જો આ ઘટના સત્ય સાબિત થાય તો બંને દેશો વચ્ચે જંગની સ્થિતિ પેદા થઈ શકે છે. અત્રે જણાવવાનું કે ચીન છેલ્લા કેટલાક દિવસથી તાઈવાનના એરસ્પેસમાં પોતાના ફાઈટર વિમાનો મોકલી રહ્યું છે. તાઈવાને ચીનની કોઈ પણ નાપાક હરકતનો જોરદાર જવાબ આપવા માટે પોતાની સૈન્ય ક્ષમતા મજબુત કરવાની તૈયારી શરૂ કરી દીધી છે. 

ચીનના કોઈ પણ પ્રકારના આક્રમક વલણને પહોંચી વળવા માટે તાઈવાનની નેવી અને એરફોર્સ અલર્ટ મોડ પર છે. રાષ્ટ્રપતિ ત્સાઈ ઈંગ વેને તાઈવાનની સૈન્ય તાકાતમાં વધારો કરવા માટે રિઝર્વ સૈન્ય દળોને વધુ મજબૂત કરવા માટે અનેક નવી જાહેરાતો કરી છે. જે મુજબ રિઝર્વ ફોર્સને તાઈવાની સેના માટે મજબૂત બેકઅપ તરીકે વિક્સિત કરવામાં આવશે. 

અમેરિકાએ તાઈવાનને આપી છે પેટ્રિયોટ મિસાઈલ
તાઈવાનને અમેરિકાએ પેટ્રિયોટ એડવાન્સ કેપિબ્લિટી-3 મિસાઈલોનું વેચાણ કરતા ચીનના સરકારી મીડિયાને ખુબ મરચા લાગ્યા છે. 620 મિલિયન ડોલરના અંદાજિત ખર્ચવાળી ડીલને અમેરિકાની મંજૂરી મળ્યા બાદ સરકારી મીડિયા ગ્લોબલ ટાઈમ્સે સીધી રીતે તાઈવાન અને યુએસને આગ સાથે રમત ન કરવાની ચેતવણી આપી. હાલના દિવસોમાં સાઉથ ચાઈના સીમાં અમેરિકાના બે એરક્રાફ્ટ કેરિયરોના યુદ્ધાભ્યાસથી પણ ચીન ચિડાયેલું છે.