US રાષ્ટ્રપતિ ડોનાલ્ડ ટ્રમ્પ અને પત્ની મેલેનિયા ટ્રમ્પ કોરોના પોઝિટિવ

વોશિંગ્ટન: અમેરિકાના રાષ્ટ્રપતિ ડોનાલ્ડ ટ્રમ્પ અને ફર્સ્ટ લેડી મેલેનિયા ટ્રમ્પનો કોરોના ટેસ્ટ પોઝિટિવ આવ્યો છે. અત્રે જણાવવાનું કે રાષ્ટ્રપતિ ડોનાલ્ડ ટ્રમ્પના બહુ જ નજીકના મહિલા સહયોગી હોપ હિક્સ (Hope Hicks) નો કોરોના રિપોર્ટ પોઝિટિવ આવતા જ વ્હાઈટ હાઉસમાં ખળભળાટ મચી ગયો હતો અને તાબડતોબ રાષ્ટ્રપતિ ટ્રમ્પ અને ફર્સ્ટ લેડી મેલેનિયા ટ્રમ્પ હોમ ક્વોરન્ટિન થયા હતા અને તેમના કોરોના ટેસ્ટ પણ કરાવવામાં આવ્યા હતા.નોંધનીય છે કે થોડા દિવસ પહેલા ટ્રમ્પે પોતાના કટ્ટર હરિફ જો બિડેનના માસ્ક પહેરવા પર મજાક ઉડાવી હતી. 

ટ્રમ્પની સાથે કરી હતી મુસાફરી
રાષ્ટ્રપતિ ડોનાલ્ડ ટ્રમ્પના કાઉન્સિલર હોપ હિક્સે તાજેતરમાં જ ટ્રમ્પની સાથે ઓહિયોમાં આયોજિત પ્રથમ પ્રેસિડેન્શિયલ ડિબેટમાં ભાગ લીધો હતો. હિક્સનો કોરોના રિપોર્ટ પોઝિટિવ (Coronavirus Test) આવ્યા બાદ સૌનું ધ્યાન ટ્રમ્પ તરફ હતું.